Қазақстанда миллион теңге жалақы кімдерге төленбек

Электрондық еңбек биржасы (Enbek.kz) – жұмыс немесе қызметкер табудың бір жолы. 2024 жылдың ақпан айында ҚР Еңбек және халықты әлеуметтік қорғау министрлігінде айтылғандай, 80,8 мың бос жұмыс орны жарияланды – бұл қаңтардағыдан 17%-ға аз, деп хабарлайды QZ Мedia тілшісі

Жарияланған түйіндемелер саны да азайды – бірден 41%-ға немесе 113,6 мың бірлікке дейін. Ведомствода атап өткендей, бұл өзгеріс біліктілігі жоқ қызметкерлерден түсетін ұсыныстардың күрт төмендеуімен байланысты орын алып отыр – 55%-ға немесе 37,9 мың бос орынға дейін.

“Шамамен 49% немесе 39,8 мың бос орынға орта білікті мамандар, ал 32% немесе 25,8 мың бос орынға жоғары білікті мамандар қажет болды. Төмен біліктілікке 19% немесе 15,2 мың орын келді. Бір қызығы, ақпан айында жұмыс берушілер бірінші кезекте “жұмыс істейтін” мамандарға жақсы табыс табуға уәде етті”,- деп хабарлады ҚР Еңбек және халықты әлеуметтік қорғау министрлігінің баспасөз қызметі.

Мысалы, өнеркәсіптік альпинистер қажет болды, оларға айына орта есеппен 1 млн теңгеден төлеуге дайын болды. Сондай-ақ жалақысы 656 мың теңгеден басталатын бас құрылысшыларды және жалақысы 600 мың теңгеден басталатын жүйелік сәулетшілер ізделді. Бұл 2023 жылдың қорытындысы бойынша орташа номиналды жалақы әлі 400 мың теңгеге дейін жетпей тұрған кезең. Бұл ретте жоғары жалақыны бірінші кезекте басқа мамандар сұрады: IT-бөлімшелердің басшылары (орта есеппен 891 мың теңгеден бастап), бұрғылау жөніндегі супервайзерлер (850 мың теңгеден бастап) және коммерциялық ұйымдардың директорлары (846 мың теңгеден бастап). Жалпы, ақпан айында негізгі сұранысты білім беру ұйымдары қалыптастырды, олар бір айда 19,2 мың бос жұмыс орнын жариялады, бұл елдегі педагогтардың жетіспеушілігін аңғартып тұр.