Индиядағы ұшақ апатынан 242 адам қаза тапты

Үндістанның Гуджарат штатында, Ахмедабад әуежайының маңында Air India әуе компаниясының жолаушылар ұшағы апатқа ұшырады. Соңғы мәлімет бойынша, апат салдарынан 242 адам қаза тапты. Апаттың ықтимал себептерінің бірі құстармен соқтығысу, деп хабарлайды QZ News.

News18 телеарнасының хабарлауынша, Гуджарат штатында апатқа ұшыраған Air India ұшағында болған 242 адамның барлығы қаза тапты.

Әуе компаниясының мәліметінше, ұшақ бортында 242 адам болған – оның ішінде 2 ұшқыш пен 10 экипаж мүшесі бар. Қайғылы оқиға Ахмедабад қаласының әуежайы маңында орын алды. Ұшақ әуеге көтерілгеннен кейін бірнеше минут өткен соң құлаған.

NDTV арнасы авиация саласының сарапшыларына сілтеме жасап хабарлағандай, апаттың алдын ала себебі – құстармен соқтығысу болуы мүмкін. Бұрынғы аға ұшқыш, капитан Саурабх Бхатнагардың айтуынша, қозғалтқыштарға құстардың бірнеше рет соғылуы салдарынан екеуі де істен шығып, ұшақ күрт биіктігін жоғалта бастаған.

«Ұшып көтерілу қалыпты жағдайда өтті. Қозғалтқыштарға құстар кіріп кетіп, тарту күшінің бір мезгілде жоғалуы мүмкін. Бұл – ұшақтың кенеттен төмендеуін түсіндіреді», – деді Бхатнагар.

Қазіргі уақытта апаттың нақты себептері ресми түрде анықталған жоқ. Қайғылы оқиғаны арнайы комиссия тергеп жатыр, оқиға орнында сарапшылар тобы жұмыс істеуде.