Біртұтас уақыт белдеуін енгізу: Мониторинг нәтижелері Сауда министрлігінде жарияланды

Сауда және интеграция министрі Арман Шаққалиев үкімет отырысында уақытты ауыстырудың қазақстандықтарға әсерін зерттеу нәтижелерін жариялады, деп хабарлайды QZ News NewTimes.kz агенттігіне сілтеме жасап.

Арман Шаққалиевтің айтуынша, зерттеу барысында деректерді талдау, сауалнама нәтижелері және уақыт белдеуін өзгертуге дейінгі және кейінгі көрсеткіштерді салыстыруды қамтитын кешенді тәсіл қолданылды.

«Зерттеулер жүргізу әдістемесі бекітілді. Ол халық денсаулығына, энергия тұтынуға, еңбек тиімділігіне, оқушылардың үлгеріміне, жол-көлік оқиғалары деңгейіне, қылмыс көрсеткіштеріне және басқа да аспектілерге уақыт белдеуін өзгертудің әсерін бағалайтын 40-тан астам метрика мен көрсеткішті қамтиды… Деректерге негізделген нәтижелер уақыт белдеуін ауыстырудың халықтың өмір сүру көрсеткіштеріне теріс әсер етпегенін көрсетті», – деді министр.

Үкімет басшысы Олжас Бектенов мемлекет басшысының бұл мәселені үкімет пен парламенттің бірлесіп қарастырып, ойластырылған шешім қабылдауын тапсырғанын еске салды.

«Министрдің есебінде көрсетілгендей, мониторинг біртұтас уақыт белдеуін енгізу туралы шешімнің теріс әсері болмағанын көрсетті. Осыған байланысты Парламент Мәжілісімен бірлесіп тиісті жұмыстарды ұйымдастыруды тапсырамын», – деді премьер-министр.

2024 жылдың наурыз айынан бастап Қазақстан біртұтас UTC+5 уақыт белдеуіне өтті. Билік бұл өзгерісті адамдардың ондаған жылдар бойы «озық уақыт» кесірінен бұзылған биологиялық ырғағын реттеу, бизнес-процестерді жақсарту және көлік қозғалысын үйлестіруді жеңілдету мақсатымен түсіндірді. Алайда, уақыт белдеуін өзгерту қазақстандықтардың көпшілігінің наразылығын тудырды.