Павлодарда қатты аязға көпірдің өзі шыдас бермеді

Қатты аяздың салдары! Павлодар тұрғындары Ертіс өзені арқылы өтетін автокөлік көпірінен қоршауға дейін жайылған жарықшақтарды анықтады. Оқиға куәгерлері әлеуметтік желіге видео жариялады. Видео бірден көпшіліктің қызу талқысына түсті, деп хабарлайды QZ Media тілшісі Zakon.kz сайтына сілтеме жасап.

Өз кезегінде “ҚазАвтоЖол” ҰК” АҚ Павлодар филиалы құлау қаупі жоқ екенін, ал сәйкессіздікке қатты аяз себеп болғанын хабарлады.

«2023 жылдың 13 желтоқсанында Ертіс өзені арқылы өтетін автомобиль көпірін тексеру барысында компенсатордың кеңеюі және қоршаудың алшақтығы анықталды. Осы факті бойынша “ҚазАвтоЖол” ҰК” АҚ ПОФ “ҚазАвтоЖол” ҰК ҚАЖҚсервис ПФ өкілдерімен бірлесіп, мердігер “Казахдорстрой” ЖШС, техникалық қадағалау “Инженеринг Сервис” ЖШС және жоба авторы “Қазақстан Промтранспроект” ЖШС көпірдің жай-күйіне шолу жүргізді. Сараптама нәтижесінде температураның төмендеуіне байланысты 7 және 9-бағаналардағы компенсаторлар 10-16 см кеңейгені анықталды», – деп хабарлады жол ұйымы.

Бұдан бөлек, тіректердің қанағаттанарлық жағдайда екені де айтылды.

“Қазір тік және көлденең жылжу, сонымен қатар жойылу қаупі жоқ”, – деп қосты департаментте.

Сонымен қатар төмен температура кезінде көпір құрылымын бақылау үшін нысанды тәулік бойы бақылау ұйымдастырылып, көліктердің өтуі қамтамасыз етілген. Мамандар көпірдің 1962 жылы салынғанын қосты.

Салмағы 10 тоннадан асатын көліктерді жылжытуға тыйым салынады. Жаңа жол өткелін салу туралы шешім қабылданды.

2023 жылдың қаңтарында Астанада осыған ұқсас жағдай орын алған болатын. Онда Қазнетте “Бүкір көпірдің” асфальты жарылып кеткенін тіркеген видео жарияланды. Көп ұзамай Астана қалалық Көлік және жол-көлік инфрақұрылымын дамыту басқармасы бұл маңда апаттық-қалпына келтіру жұмыстары жүргізілетінін жеткізді.