Қазақстан мен Ресей +7 телефон коды бойынша шешім қабылдады

Қазақстан мен Ресей арасында телефон кодтарын бөлу туралы келісім заң жүзінде бекітілуде. Бұл жөнінде ҚР Цифрлық даму, инновациялар және аэроғарыш өнеркәсібі министрлігі жариялаған қаулы жобасында айтылған, деп хабарлайды QZ News Tengrinews.kz сайтына сілтеме жасап.

Құжатта +7 халықаралық телефон коды шеңберінде екі елдің қай сандық комбинацияларды пайдаланатыны нақты көрсетілген.

«Қазақстан дүниежүзілік нөмірлеу жүйесінің 7-аймағында келесі код диапазондарын пайдаланады: +7 0; +7 6; +7 7. Ал Ресей келесі кодтарды қолданады: +7 2; +7 3; +7 4; +7 5; +7 9», – делінген құжатта.

Қазіргі уақытта бұл жоба көпшілік талқылауына ұсынылған және 2 маусымға дейін жалғасады. Құжат күшіне енген соң, Қазақстан мен Ресей үкіметтері арасында өткен жылы қол қойылған +7 кодын бірлесіп пайдалану туралы келісім заңды түрде бекітіледі.

2021 жылы Қазақстан +7 кодынан бас тартып, жаңа +997 халықаралық кодын резервке қойған болатын. Алайда кейін қазақстандық мамандар жаңа кодқа көшу техникалық және қаржылық қиындықтар туғызатынын түсінді. Бұл жағдайда қазақстандық абоненттер барлық сервистердегі – мемлекеттік, банктік, әлеуметтік желілер мен түрлі қосымшалардағы – деректерін толықтай жаңартуға мәжбүр болар еді. Сол себепті 2023 жылы бұл идеядан бас тартылды.

2023 жылдың қазан айында Қазақстан мен Ресей +7 кодын бірлесіп пайдалану туралы келісім жобасын мақұлдады. Жобаға сәйкес, қос ел халықаралық телефон желісінің 7-аймағындағы нөмірлерді (яғни +7) бірлесіп пайдалануды жалғастырады.

Құжатта Қазақстан келесі код диапазондарын пайдаланады деп көрсетілген: 000–099, 600–699, 700–799. Мысалы, +7 (775), +7 (701) – Қазақстанға тиесілі.

Ал Ресей мынадай кодтарды ерекше тәртіппен қолдана алады: 200–299, 300–399, 400–499, 500–599, 810–818, 820–821, 831, 833–836, 840–848, 850–851, 855–857, 860–863, 865–867, 869, 871–873, 877–880, 900–999. Мысалы, Ресейде +7 (950), +7 (904) кодтары жиі қолданылады.