1 қыркүйекте Президенттік жастар кадр резервіне іріктеуге құжат қабылдау басталады

Президенттік жастар кадр резерві – Мемлекет басшысының талантты жастар үшін пәрменді әлеуметтік лифт болып табылатын алғашқы жария бастамаларының бірі.

БІРІНШІ КЕЗЕҢ – құжат қабылдау. Резервке іріктеуге қатысу үшін кандидаттардың құжаттарын қабылдау 2023 жылдың 1-30 қыркүйегі аралығында pkrezerv.gov.kz сайтында онлайн режимде жүзеге асырылады.

ЕКІНШІ КЕЗЕҢ – мәтіндік және сандық ақпаратпен жұмыс істеу қабілетін бағалау. Бұл кезең үміткерлердің күрделі мәтіндік және сандық ақпаратпен жұмыс істеу қабілетін анықтауға бағытталған екі бөлек тестілеу блогынан тұрады.

ҮШІНШІ КЕЗЕҢ – ситуациялық тапсырмаларды шешу. Бұл кезең үміткерлердің таңдаған салалық бағыттарына байланысты ситуациялық тапсырмалар түріндегі нақты проблемаларды шешуге деген көзқарасын бағалауға бағытталған.

ТӨРТІНШІ КЕЗЕҢ – құзыреттерді бағалау. Мұнда кандидаттардың мінезін бағалау топтық және жеке тапсырмалардан тұрады.

БЕСІНШІ КЕЗЕҢ – сарапшылық комиссиясында кандидаттармен әңгімелесу.

Комиссия отырысының қорытындысы бойынша ұлттық комиссия отырысында қарауға ұсынылатын қатысушылардың тізімі жасалады.

АЛТЫНШЫ КЕЗЕҢ – Ұлттық комиссияның отырысы. Отырыста Президенттік жастар кадр резервіне үздік 50 кандидат қабылданады.

Үміткерлерге қойылатын негізгі талаптар:

– ҚР азаматтылығы бар;

– жасы 35-тен аспаған;

– жоғары білімді;

– 5 жыл жалпы жұмыс тәжірибесі;

– мемлекеттік тілді В1 деңгейінен төмен емес меңгерген болуы қажет.

Іріктеуге қатысуға Президент тағайындаған адамдар, саяси қызметшілер, «А» корпусының мемлекеттік әкімшілік қызметшілері, Президенттік жастар кадр резервінде тұрған адамдар жіберілмейді.