2024 жылы 254 солтүстікқазақстандық интернет-алаяқтардың қармағына түсті

Тәртіп сақшыларының түсіндіру жұмыстарына қарамастан, облыс тұрғындары әлі де интернеттегі алаяқтардың айла-амалдарына тап болуда. Осы орайда полицейлер солтүстікқазақстандықтарға қарсы жиі қолданылатын бірқатар танымал әдіс-тәсіл туралы айтты, деп хабарлайды QZ Мedia тілшісі.

Алаяқтар танымал әлеуметтік желілерде, видеохостингтерде жарнама орналастырады, осылайша өз құрбандарын қолайлы жағдайлармен қызықтырады. ҚР әрбір тұрғынына дивидендтер төлеу туралы ақпарат жариялайды, белгілі адамдармен видеолар ұсынады, сол арқылы жарық көрген ақпаратқа сенім арттырады.

“Облыс орталығының 38 жастағы тұрғыны дәл осындай тәсілдің құрбаны болды. Наурыз айында ол YouTube видеохостингінде инвестиция салуды ұсынатын жарнаманы көреді, сілтеме бойынша өтіп, сауалнама толтырды. Содан кейін қулар онымен Telegram желісінде хабарласып, мәмілелерді қалай жүргізу керектігін түсіндіреді. Бастапқы сауда-саттық үшін 990 000 теңге енгізу қажет болған. Жәбірленуші аталған соманы енгізіп, оның ақшасының қалай өсетінін күтеді. Сома өседі, осы сәтте азамат ақшаның бір бөлігін алғысы келді, бірақ қолынан түк те келмейді”, – деді СҚО ПД криминалдық полиция басқармасының аса маңызды істер жөніндегі аға жедел уәкілі Виталий Подчернин.

Қала тұрғынына кеңес берген адам өзінің профилін жойып, байланысқа шығуды тоқтатады. Осыдан кейін ер адам алаяқтардың құрбаны болғанын түсінеді. Қулар банктің “қызметкерінен” қоңырау шалу схемасын қолдануды да жалғастыруда.

“Облыс орталығының 57 жастағы тұрғыны мұндай тәсілдің құрбаны болды. Сәуірде оның ұялы телефонына белгісіз қыз қоңырау шалып, өзін ұялы байланыс операторы ретінде таныстырады, SIM картасы ескіргенін түсіндіріп, оны ауыстыруды ұсынады. Осыдан кейін жәбірленушінің ұялы телефонына 4 таңбалы код түседі, оны жәбірленуші айтады, осылайша әңгіме аяқталады. Содан кейін жәбірленушіге қайта қоңырау шалып, өздерін банктің қауіпсіздік қызметкері ретінде таныстырады және алаяқтар оның атынан несие алғанын түсіндіреді. Жоюдың амалын да ұсынады. Қулар іске жол бермеу үшін “Хоп ту деск” бағдарламасын жүктеп алуды талап етеді”, – деді Виталий Подчернин

Нәтижесінде алаяқтар оның атына 500 000 теңге несие рәсімдеді.

“Банк мекемелерінің қызметкерлері телефон арқылы сөйлескенде өз клиенттерінен банк карталарының нөмірлері мен кодтарын нақтыламайды, өйткені олар өздеріне белгілі. Банктің атынан келген хабарламаның заңдылығын тексеру үшін банктің ресми телефон нөміріне қоңырау шалыңыз. Құпия деректеріңізді бөгде адамдарға бермеңіз. Сізде жоқ адамдардан немесе шарттық қатынастар болмаған ұйымдардан күдікті электрондық хаттар немесе мәтіндік хабарламалар келсе, жауап бермеңіз”, – деді СҚО ПД криминалдық полиция басқармасының аса маңызды істер жөніндегі аға жедел уәкілі.

Алаяқтардың құрбаны болған адам дереу жақын жердегі полиция бөлімшесіне хабарласуы керек. Жыл басынан бері СҚО-да интернет-алаяқтықтың 254 фактісі тіркелген.