«Ауыл Аманаты» СҚО тұрғындарының өмірін қалай өзгертуде

2025 жылы Солтүстік Қазақстан облысында «Ауыл Аманаты» бағдарламасын жүзеге асыруға 1,5 млрд теңге бөлінді. Бұл қаражат 222 микрокредит беруге және 242 жаңа жұмыс орнын құруға бағытталған. Бағдарламаның өңірдегі жүзеге асырылуы, жоспарлары мен нәтижелері туралы СҚО ауыл шаруашылығы және жер қатынастары басқармасының басшысы Даурен Тоқужанов QZ News-ке айтып берді.

«Ауыл Аманаты» жобасы ауылдық аумақтарды қолдауға, тұрғындардың өмір сүру сапасын жақсартуға және ауыл шаруашылығында тұрақты жұмыс орындарын ашуға бағытталған. СҚО-да бұл бағдарлама 2023 жылдан бері іске асырылуда. «Аманат» партиясының филиалы және Кәсіпкерлер палатасымен бірлесіп, барлық ауылдық округ әкімдерін оқыту жұмыстары жүргізілді.

«Бағдарлама аясында ауылдық жерлерде бірегей кәсіпорындар ашылып, тұтас отбасыларды тұрақты жұмыспен қамтуға мүмкіндік берілді. Бағдарламаның жарқын мысалдарының бірі – Қызылжар ауданы Бескөл ауылында ашылған «Семейная ферма» ЖК шаруашылығы. Бұл шаруашылықта үш инкубатордың көмегімен бөдене өсіру жолға қойылған. Құс шаруашылығының жалпы сыйымдылығы – 1 500 бөдене, қазіргі таңда мұнда 500-ге жуық техас және эстон тұқымды бөдене бар», – деді Даурен Тоққожинов.

Бұдан бөлек, кооперация құру бойынша жобалар іске асырылуда.

«Жалпы 140,1 млн теңге сомасына 6 өтінім түсті, олардың барлығы қаржыландырылды. 5 кооператив ауыл шаруашылығы жануарларын (жылқы, ІҚМ, ҰҚМ) өсірумен айналысады, ал 1 кооператив сүт өнімдерін қайта өңдеумен айналысады.Алдағы уақытта ауыл шаруашылығы кооперативтерін дамыту жалғасады, «Ауыл Аманаты» бағдарламасына қатысатын әр ауылдық округте кооперативтер құрылып, жеке қосалқы шаруашылықтар тартылатын болады», – деді басқарма басшысы.

Бағдарламаны тиімді іске асыру үшін облыстық экономика басқармасы ауылдық жерлерде дамытуға болатын салалар бойынша ұсыныстар берді. Олардың ішінде: шағын құс фермалары, ет өнімдері мен шұжық өндірісі, жылыжайлар – гүл өсіру және көкөністерді консервілеу, бал өндіру, жүн мен тері өңдеу, құрылыс материалдарын шығару секілді бағыттар бар.

«Соңғы уақытта туризм саласын дамытуға үлкен көңіл бөлінуде. Мәселен, Айыртау ауданының Шалқар ауылындағы «Арлан» демалыс аймағын кеңейту үшін «Қазкенов Т.А.» ЖК модульдік уақытша орналастыру үйін сатып алу мақсатында несие алды. Кеңейтуден кейін демалыс базасы айына 60 адамға дейін қабылдай алады. Осындай жобалар негізінде әр ауданда ауыл тұрғындарын табыспен және жұмыс орындарымен қамтамасыз ететін бірегей кәсіпорындар ашу қажет», – деп түйіндеді спикер.