Петропавлда Алғыс айту күні мен Ассамблеяның 30 жылдығына арналған «Туған жерім – Қазақстаным» форумы өтті

Солтүстік Қазақстан облысында өңір басшысы Ғауез Нұрмұхамбетовтің қатысуымен «Туған жерім – Қазақстаным» форумы өтті. Іс-шара Алғыс айту күні мен Қазақстан халқы Ассамблеясының 30 жылдығына арналды, деп хабарлайды QZ News.

Форумға әртүрлі этнос өкілдері, қоғамдық ұйымдардың мүшелері және өңіріміздегі этносаралық келісімді нығайту мен дамытуға белсенді атсалысып жүрген азаматтар жиналды.

Облыс әкімі Мемлекет басшысының Қазақстан халқы Ассамблеясының 30 жылдығына арналған құттықтауын оқып берді. Президент өз құттықтауында Ассамблеяның елдегі бірегей қоғамдық келісім мен бірлік моделін қалыптастырудағы маңызын атап өтті. Соңғы үш онжылдықта бұл құрылым елдегі бейбітшілік, тұрақтылық және көпұлтты қоғамның дамуын қамтамасыз етуде маңызды рөл атқарып келеді.

Форум аясында Ассамблеяның дамуына елеулі үлес қосқан солтүстікқазақстандықтарға Алғыс хаттар табысталды. Бұл марапаттар өңірдегі халықтар арасындағы достық, ынтымақтастық және өзара түсіністікті нығайту жолында еңбек етіп жүрген азаматтардың еңбегін мойындаудың белгісі болды.

«Бұл күн – бірлігіміз бен өзара көмектің ел дамуы мен өркендеуі үшін қаншалықты маңызды екенін еске салады. Алғыс айту күні құтты болсын!», – деп жазды өңір басшысы әлеуметтік желіде.