Қазақстан Республикасы Жоғары білім және ғылым министрінің кеңесшісі петропавлдық оқушыларға қос дипломдық бағдарламалар туралы айтып берді
Қозыбаев университетінде Қазақстан Республикасы Жоғары білім және ғылым министрінің кеңесшісі Руслан Емелбаев болды. Ол ғылыми-зерттеу зертханалары мен 1200 орындық студенттерге арналған жаңа жатақхананы аралады, деп хабарлайды QZ News тілшісі.
Сондай-ақ, университеттің қабылдау кеңсесінің мамандарымен бірге Әбу Досмұхамбетов атындағы дарынды балаларға арналған облыстық мамандандырылған мектеп-интернатының оқушыларымен кәсіптік бағдар беру кездесуін өткізді.
«Солтүстік Қазақстан облысына келудегі басты мақсаттардың бірі – жоғары сынып оқушыларымен кездесу өткізу. Қазіргі таңда кәсіптік бағдар беру мәселесі өте өзекті. Елбасымыз өз Жолдауында талапкерлердің өз мамандығын саналы түрде таңдауы керектігін ерекше атап өтті. Мамандарды даярлау сапасын арттыру үшін Қазақстан Республикасы Жоғары білім және ғылым министрлігінің маңызды шараларының бірі елімізде шетелдік жоғары оқу орындарының филиалдарын ашу болды. Қос дипломдық бағдарламалардың іске қосылуы талапкерлерге жақсы мүмкіндіктер берді. Біз бұл туралы мектеп оқушыларына егжей-тегжейлі айтып бердік», – деді Руслан Емелбаев.
Қозыбаев университеті республикада бірінші болып Аризона университетімен қос дипломдық бағдарламаларды жүзеге асыру бойынша ынтымақтастық жобасын іске қосты. Бүгінгі таңда олар 3 бағыт бойынша жүзеге асырылады: биотехнология, ақпараттық жүйелер, білім берудегі инклюзия.