СҚО-да ауыл шаруашылығы санағына дайындық аясында үй шаруашылықтарын алдын ала аралау басталды
Алдағы ауыл шаруашылығы санағына дайындық шеңберінде 1 маусымнан бастап Мамлютка, Булаево, Сергеевка және Тайынша қалаларында үй шаруашылықтарын алдын ала аралау (листинг) жұмыстары басталды, деп хабарлайды QZ News.
Бұл маңызды кезең 30 маусымға дейін жалғасады. Оның басты мақсаты – негізгі сауалнамаға жататын үй шаруашылықтарының тізімін нақтылау, сондай-ақ олардың нақты тұрып жатқаны мен жеке қосалқы шаруашылық жүргізіп отырғанын растау.
Солтүстік Қазақстан облысы бойынша Ұлттық статистика бюросының департаментінде атап өткендей, листинг – бұл санақтың өзі емес, бірақ негізгі кезеңге дайындалудың маңызды қадамы. Ол алдағы ауыл шаруашылығы санағының дәлдігі мен тиімділігін барынша қамтамасыз етуге мүмкіндік береді.
Аралау жұмыстарына тартылған Ұлттық статистика бюросының барлық өкілдерінде жеке бейдж-құжат пен планшет болады. Бұл тұрғындарға санақ қызметкерлерін оңай тануға мүмкіндік береді.