Су тасқыны-2025: Гауез Нұрмұхамбетов аудан әкімдерімен қорытынды кеңес өткізді
Өңір басшысы Қызылжар, Есіл, Мамлют, Мағжан Жұмабаев, Жамбыл аудандарының және Петропавл қаласының әкімдерімен, сондай-ақ жауапты ведомстволар басшыларымен қорытынды кеңес өткізді. Негізгі назар су тасқыны кезеңіне дайындыққа аударылды. Бұл өткен жылғы тасқыннан зардап шеккен Петропавл, Есіл және Қызылжар аудандарының тәжірибесін ескере отырып талқыланды, деп хабарлайды QZ News.
Қызылжар ауданында Бескөл, Прибрежное және Тепличное ауылдарында бөгеттер нығайтылды. Приишимка, Боголюбово, Большая Малышка, Семиполатное және Соколовка ауылдарында қорғаныс үйінділері салынды. Жақын арада Ольшанка, Долматово, Барневка, Затон және Кривозерка ауылдарында да топырақ үйінділері тұрғызу жоспарлануда.
Есіл ауданында Новоузенка, Гурьяновка және Покровка ауылдарында қорғаныс бөгеттері күшейтілді. Бірлік, Бұлақ, Жарғайын, Қарағай және Ақтас ауылдарына кіреберіс жолдарға су өткізу құбырлары орнатылды. Сондай-ақ Петропавл – Жезқазған республикалық трассасында, Есіл өзені арқылы өтетін көпір маңында диаметрі 1 метрлік үш су өткізу құбыры қойылды.
Петропавл қаласында көктемде жеке тұрғын үйлер орналасқан аудандар еріген қар суынан зардап шегеді. Әсіресе, Жұмысшы кенті мен Береке шағын ауданына қауіп төнеді. Су басу қаупі туындаған жағдайда аулалардан су сорып шығару үшін мотопомпалар қолданылады. Қазіргі таңда 92 мотопомпа бар, оның 50-і биыл сатып алынған. Нөсерлік кәріз жүйелерін тазарту жұмыстары жүргізілуде. Береке ауданында су бұру арнасы салынып жатыр.
Жұмыс сапары барысында өңір басшысы Тепличное, Бескөл, Ущево және Былғары зауыты кентіндегі бөгеттерді нығайту жұмыстарын тексерді. Новокаменка ауылының маңында Есіл өзенінде мұз кептелістерінің алдын алу үшін жару жұмыстары жүргізілді. Су тасқыны кезеңіне дейін мұндай жұмыстар Есіл өзенінің және шағын өзендердің 46 учаскесінде жүргізіледі.
