Петропавлда “Қарасай” стадионын қалыпқа келтірудің екінші кезеңі жүріп жатыр

Облыс орталығында “Қарасай” стадионын қалыпқа келтірудің екінші кезеңі өтуде. СҚО дене шынықтыру және спорт басқармасының басшысы Сергей Мелехов әлеуметтік желілердегі парақшаларында қазір стадионның қандай күйде екенін және қандай жұмыстар жүріп жатқанын көрсететін видеоролик жариялады, деп хабарлайды QZ Мedia тілшісі.

Естеріңізге сала кетейік, өткен жылы мұнда жылытылатын және суарылатын жасанды алаң, жаңа жарықтандыру, электронды табло және дыбыстық жабдық пайда болды. 

Биыл батыс және шығыс трибуналарды, трибуналық үй-жайларды, киім ауыстыратын бөлмелер мен жуынатын бөлмелерді жөндеу жоспарлануда. Батыс трибунаға жаңбырлы ауа-райында аса қажет шатыр да орнатылады. Сонымен қатар, жауапты мамандар трибунаның ортасынан командаларға арнайы шығу дәлізін жасайды.

Сондай-ақ, орындықтар мен жүгіру жолының тартан жабыны ауыстырылады. Шығыс трибунасында бұқаралық ақпарат құралдарына арналған орындар пайда болады және әкімшілік корпус салынады. Стадион аумағын және тұрақ орындарын абаттандыру да назардан тыс қалмайды.

Қайта құрудан кейін “Қарасай” стадионы УЕФА талаптарына сәйкес келеді, бұл Петропавлда еурокубок матчтарын өткізуге мүмкіндік береді.