Солтүстік Қазақстан облысында балалар спорты қалай дамып жатыр
Өскелең ұрпақтың дене тәрбиесі — денсаулық сақтау және спорт саласындағы мемлекеттік саясаттың басты бағыттарының бірі. Балалар мен бұқаралық спортты дамыту азаматтардың өмір сапасына тікелей әсер етіп, ұлт денсаулығын нығайтады және болашақ чемпиондардың әлеуетін қалыптастырады. Спорт саласының СҚО-да қалай дамып жатқаны жөнінде Солтүстік Қазақстан облысы дене шынықтыру және спорт басқармасы басшысының міндетін атқарушы Әділхан Сағындықов айтып берді, деп хабарлайды QZ News.
2024 жылы Қазақстанда спорттық инфрақұрылымды дамыту белсенді түрде жалғасты — 74 жаңа спорт нысаны салынды. Сонымен қатар балалар үшін спорт қолжетімді бола түсті — ел бойынша 240 мыңнан астам бала 7,5 мың спорттық секцияға тегін қатысып жүр. 2025 жылы бұл көрсеткіштер одан әрі артады деп күтілуде: 300 мыңнан астам бала 10 мың секцияда тегін спортпен шұғылданатын болады.
Балалар спортын дамыту — бұл тек елдің болашақ спорттық элитасына салынған инвестиция ғана емес, сонымен қатар дені сау, озық ойлы жастарды қалыптастырудың маңызды құралы. Спортпен тұрақты шұғылдану иммунитетті нығайтады, төзімділікті дамытады, қозғалыс үйлесімділігін жақсартады, күйзеліске төзімділік пен зейінді арттырады. Спорт — тәртіпке үйретеді, өз-өзіне сенімділікті нығайтады, командалық рух пен қарсыласқа құрмет көрсетуге баулиды.
Солтүстік Қазақстан облысында бұқаралық спорт жақсы дамып келеді. 2024 жылы облыста 36 жаңа спорт нысаны салынып, пайдалануға берілді. Олардың қатарында дене шынықтыру-сауықтыру кешендері, жабық хоккей корттары, шағын-футбол алаңдары мен спорттық алаңдар бар. Соның нәтижесінде өңірдегі спорт инфрақұрылымымен қамту деңгейі 53,8%-дан 57,3%-ға дейін өсті.
«Балалардың спортпен шұғылдануына қолжетімділікке ерекше көңіл бөлінеді. Өңірде 28 балалар мен жасөспірімдер спорт мектебі (оның ішінде 10-ы мамандандырылған) жұмыс істейді. Қазіргі таңда бұл мектептерде 14 618 бала тегін жаттығады — бұл өткен жылмен салыстырғанда 636 балаға артық. Балалардың саны артуына байланысты 2024 жылы 14 спорт түрі бойынша қосымша бөлімшелер ашылды. Облыста 648 жаттықтырушы еңбек етеді, олардың біліктілігін арттыру курстары тұрақты түрде өткізіледі. 2025 жылғы ақпанда Петропавлда елордалық сарапшылардың қатысуымен 120-дан астам маманға арналған тегін курстар өткізілді», – дейді Әділхан Сағындықов.
Айта кетейік, 2024 жылы солтүстікқазақстандық БЖСМ тәрбиеленушілері халықаралық және республикалық жарыстарда 414 медаль, ал облыстық чемпионаттарда мыңға жуық медаль иеленді. Жаңа спорттық ұрпақтың жарқын өкілдері — Кристина және Инесса Шумековалар, Анна Стратан, Михаил Подлужный, Диас Омаров және басқалар. Олардың барлығы спорт жолын БЖСМ секцияларынан бастаған.
«Баланы БЖСМ-ге жаздыру үшін тікелей мектепке хабарласып, қолайлы бағытты таңдап, қажетті құжаттарды ұсыну керек. Сондай-ақ, 2021 жылдан бастап елімізде мемлекеттік спорттық тапсырыс бағдарламасы жұмыс істейді. Ол ата-аналарға балаларды ақылы секциялардан мемлекет қаржыландыратын тегін секцияларға ауыстыруға мүмкіндік береді. Өтінімді artsport.edu.kz порталы арқылы беруге болады, содан кейін бала ваучер алып, жаттығуға кірісе алады», – дейді Әділхан Сағындықов.