7 мамыр күні солтүстікқазақстандықтар Қарасай мен Ағынтай батырларға тағзым етті

Петропавлда Қарасай мен Ағынтай батырларға арналған мемориалға гүл шоқтарын қою рәсімі өтті. Тарихи тұлғаларға құрмет көрсету үшін әскери қызметшілер, ардагерлер, құрметті қонақтар, еріктілер, облыс әкімі Ғауез Нұрмұхамбетов, сондай-ақ қала тұрғындары келді, деп хабарлайды QZ Мedia тілшісі.

7 мамыр – Қазақстан Республикасы Қарулы Күштерінің құрылған күні. 1992 жылы Қазақстанда ҚР Қарулы Күштері құрылды.

“Біз бір жүйемен жұмыс істейміз және қызмет етеміз, әскери намыс пен борышымызды толық тәртіппен өтейміз. Біздің әскерлер барлық оқу-жаттығуларда жақсы нәтижелер, үйлесімділік пен беріктік көрсетеді”, – деді СҚО Қарулы күштері Ардагерлер кеңесінің төрағасы Қалиолла Сауытбеков.

Қарасай мен Ағынтай батырлар – көрнекті қолбасшылар, жоңғар басқыншыларына қарсы шайқастардың қатысушылары. Олардың батылдығы, әскери өнері және өз халқына деген жанқиярлық адалдығы – қазақстандық ұрпақтар үшін үлгі.