Балаларға МӘМС аясында тегін медициналық қызмет көрсетіледі

Балаларды қорғау күні қарсаңында Әлеуметтік медициналық сақтандыру қоры (ӘМСҚ) кішкентай пациенттер үшін Мемлекеттік кепілдендірілген тегін медициналық көмек (МКТМК) және Міндетті әлеуметтік медициналық сақтандыру (МӘМС) аясында қолжетімді медициналық қызметтер бар екендігін еске салады, деп хабарлайды QZ News.

«Халық денсаулығы және денсаулық сақтау жүйесі туралы» Кодекске сәйкес, Қазақстанда 18 жасқа дейінгі балалардың денсаулығы туралы тегін ақпарат алу құқығын қоса алғанда, ерекше құқықтары бар. Балалар МӘМС жүйесіне қатысушылар болып табылады, өйткені мемлекет олар үшін жарналар төлейді. Бұл оларға барлық қажетті медициналық көмекті тегін алуға мүмкіндік береді.

«2025 жылы балаларға профилактикалық тексерулер мен скринингтер жүргізуге 47,5 млрд теңге қарастырылған. Бұдан бөлек, мектеп медицинасын қаржыландыруға осы жылы 28,1 млрд теңге бөлінді», — деді Әлеуметтік медициналық сақтандыру қоры басқарма төрағасының орынбасары Сәуле Тәжібаева.

Мектеп медицинасы мектепке дейінгі және мектеп ұйымдарына баратын балалардың денсаулығын үздіксіз бақылауды қамтамасыз етеді. Бұл бағыт аясында балалар ата-анасының келісімімен Ұлттық екпе күнтізбесіне сәйкес вакцинациядан өтеді және жыл сайынғы профилактикалық тексерулерден өтеді. Бұл тексерулер МӘМС жүйесіне кіреді. Егер тексеру кезінде қандай да бір патология анықталса, бала тексеру үшін емханаға жіберіледі.

Медицина қызметкерлері тексерулер мен вакцинация жүргізу үшін мектептер мен балабақшаларға барады, ал ата-аналар бұл туралы алдын ала хабардар етіледі. Білім беру ұйымдарындағы медпункттер алғашқы көмек көрсетіп, сондай-ақ балалар арасында саламатты өмір салтын қалыптастыру бойынша шаралар өткізеді.

Егер қандай да бір себеппен балаңыз мектепте немесе балабақшада профилактикалық тексеруден немесе екпеден өтпей қалса, оны жазда тіркелген емханада өтуге болады.

МКТМК аясында балаларға келесі қызметтер тегін көрсетіледі:

• шұғыл медициналық көмек;
• бастапқы медико-санитарлық көмек;
• созылмалы және әлеуметтік маңызы бар ауруларды емдеу және бақылау.

«Жазда балалардың бос уақыты көп, оқу жүктемесі жоқ. Бұл денсаулықты жақсартуға тамаша мүмкіндік. Мысалы, медициналық көрсеткіштер болған жағдайда МӘМС аясында оңалтудан өтуге болады. Оған физиотерапия, массаж, емдік дене шынықтыру және басқа да дәрігер-реабилитолог тағайындайтын процедуралар кіреді», — деп атап өтті Сәуле Тәжібаева.

Жазғы демалыс кезінде оқушылар офтальмолог, ЛОР, хирург, стоматолог сынды тар бейінді мамандардың консультациясын ала алады. Қажет болған жағдайда диагностикалық тексерулер (зертханалық талдаулар, УДЗ, ЭКГ, рентген, КТ, МРТ) жүргізіледі. Емдеу амбулаториялық немесе ауруханаға жатқызу арқылы жүргізілуі мүмкін. Мұның бәрі МӘМС жүйесі аясында тегін.