Бюрократиялық қиындықтар петропавлдықтар үшін қолайсыздық туғызуда

Ешкім мән бермей жатқан су басу туралы Жуков көшесінің тұрғындары дабыл қағуда. Жергілікті тұрғындардың айтуынша, олар бұған дейін «СевҚазЭнерго», «Қызылжар су» және қала әкімдігіне бірнеше рет хабарласқан, бірақ одан ешқандай өзгеріс болмаған, деп хабарлайды QZ Media тілшісі.

Мәселе тағы бір бюрократияның кесірінен шешілмей тұр. Қала әкімдігінде, әлеуметтік желіде таралған мәселеге қатысты жауап берілді.

«Бұл ауданда бірнеше құбыр бар, олардың иелері – «СевқазЭнерго» АҚ, «Қызылжар су» ЖШС және «Петропавл жылу желілері». Бүгінгі таңда судың қай желіге тиесілі екенін анықтау үшін сараптама жүргізілді. Оның қорытындысы бойынша желілердің иесі залалды жою шараларын қабылдайды», – делінген хабарламада.