Еріктілер Петропавл қаласының коммуналдық қызметкерлері мен автобус жүргізушілеріне шай мен бауырсақ апарды

Республика күні қарсаңында Петропавлда “Жанашыр жүрек” акциясы өтті. Облыс орталығының еріктілері коммуналдық қызметкерлерге жаңа піскен бауырсақ пен ыстық шай жеткізді, деп хабарлайды QZ media тілшісі.

Барлығы 10 келі бауырсақ таратылды. Еріктілер қаланың орталық көшелерімен жүріп, коммуналдық қызмет қызметкерлері мен қоғамдық көлік жүргізушілеріне дәм

татқызды. Әрбір қазақстандықтың өтеусіз көмек көрсетуге қатысуы арқылы елде қайырымдылық мәдениетті дамыту – “Жанашыр жүрек” акциясының басты мақсаты.

“Акцияға өңірлік волонтерлік фронт-офис, “Ауыл” партиясының белсенділері және біздің күміс волонтерлер қатысты. Біз әрқашан көшеде жұмыс істейтін адамдар үшін, әсіресе, суық күндерде осындай акциялар ұйымдастырамыз. Еріктілерді жағымды күлімсіреу мен алғыс сөздер жылытады, сондай-ақ қызметкерлерді ыстық шай жылытады”, – деп атап өтті Қоғамдық даму және ақпарат орталығының бөлім басшысы Анастасия Волкова.