Kozybaev University студенттері пластик жинап, ағаш отырғызу акциясын өткізді

Kozybaev University-дің бірінші корпусының алдындағы бас алаңда «Ғаламшарды пластиктен құтқарайық!» атты экологиялық акция өтті. Іс-шара республикалық «Таза Қазақстан» бағдарламасы аясында және Дүниежүзілік қоршаған ортаны қорғау күніне орай ұйымдастырылды, деп хабарлайды QZ News тілшісі.

Акцияны ұйымдастырушылар — Петропавл қаласының Жастар ресурстық орталығы және Kozybaev University-дің экология және география кафедрасы. Шараға студенттер, оқытушылар мен еріктілер қатысты.

«Біздің басты мақсатымыз — жастарды нақты экологиялық әрекеттерге тарту. Мұндай жобалар арқылы студенттерде табиғатқа жауапкершілікпен қарау қалыптасады, командалық жұмыс дағдылары дамиды», — деді жастар ресурстық орталығының жетекшісі Дамир Абдин.

Қатысушылар бірнеше командаға бөлініп, түрлі белсенділіктерден өтті: саламатты өмір салтына арналған таңғы жаттығу, ПЭТ-бөтелке жинау, көшет пен гүл отырғызу, экологиялық квест және қоршаған ортаны қорғау тақырыбындағы суреттермен алаңды көркемдеу. Экология және география кафедрасының оқытушысы Әсел Бектемірованың айтуынша, пластик бөтелкелерді жинау алдын ала басталған.

«31 мамырдан бастап университет аумағында ПЭТ-бөтелкелерге арналған арнайы контейнерлер орнатылды. Барлық студенттер, қызметкерлер мен еріктілер белсенді түрде атсалысты. Бүгін біз қорытынды жасаймыз, ал жиналған пластикті “Радуга” ЖШС-не қайта өңдеуге тапсырамыз. Бұл экологиялық мәдениетті дамыту мен тұрақты болашаққа қосқан үлесіміз», — деді Әсел Бектемірова.

Kozybaev University студенті Адия Тұрғынова сенбілікке қатысудың маңызын атап өтті:

«Бұл жай ғана сенбілік емес. Бұл — маңызды бір істің бөлшегі болуға мүмкіндік. Өз еңбегіміздің нәтижесін көреміз және түсінеміз. Әр адам қоршаған орта жағдайына әсер ете алады», — деді студент.

Ұйымдастырушылардың айтуынша, бұл акция бір реттік шара емес. Мұндай бастамалар тұрақты түрде өткізіліп, студенттер мен қала тұрғындарының кең ауқымын қамтитын болады.