Петропавлда Семей полигонының ардагерлеріне ескерткіш орнату ұсынылды

Облыс орталығындағы Достық үйінің қабырғасында үкіметтік емес ұйымдар өкілдері мен мемлекеттік органдардың мамандары кездесу өткізді. Іс-шараның бастамашысы СҚО ішкі саясат басқармасы болды, деп хабарлайды QZ News тілшісі.

“Коммерциялық емес ұйымдар қоғамда шешуші рөл атқарады. Олар білім беру мен денсаулық сақтаудан бастап қоршаған орта мен адам құқықтарын қорғауға дейінгі әртүрлі салаларда қолдау мен көмек көрсету үшін алдыңғы қатарда жұмыс істейді. Мемлекеттік органдар өз кезегінде ауқымды бағдарламалар мен жобаларды іске асыруға мүмкіндік беретін ресурстар мен өкілеттіктерге ие”, – деп атап өтті “СҚО Азаматтық Альянс қауымдастығы” ЗТБ төрағасы Әсел Есжанова.

Спикер СҚО-да ҮЕҰ мемлекеттік органдармен бірлесіп, аз қамтылған отбасыларға, балалар мен қарттарға көмек көрсетуге, білім беру саласын қолдауға бағытталған бағдарламаларды іске асыратынын, сондай-ақ ормандарды қалпына келтіру, су айдындарын тазарту жөніндегі жобаларды қолға алатынын айтты. Кездесу барысында қалалық ардагерлер кеңесінің төрағасы Жангелді Тәжин өз ұсынысын білдірді.

“Ұлттың рухани жағдайына назар аударып, СӨС насихаттауға баса назар аудару керек. Бізге осындай бағыттағы жобалар жетіспейді. Ардагерлер кеңесінің мүшелері осындай жұмысқа қатысуы мүмкін”, – деп атап өтті қалалық ардагерлер кеңесінің төрағасы Жангелді Тәжин.

Қоғамның дені сау ғана емес, мәдени тұрғыда да дамыған болуы керек. Бұған “СҚО Семей полигоны” ҚБ төрағасы Асхат Төлепбергенов ынталы. Ол Достық үйіндегі кездесуде Семей полигонының ардагерлеріне ескерткіш орнатуды сұрады.