Петропавлда волейболдан жасөспірімдер арасында ҚР чемпионаты өтуде

Петропавлда волейболдан 2006-2007 жылдары туған жасөспірімдер арасында ҚР чемпионаты өтуде. Жарысты «Жеңіс» спорт мектебінде тамашалауға болады, деп хабарлайды QZ News тілшісі.

Чемпионат 28 қазанда басталды. Ойындар 2 қарашаға дейін жалғасады. 70 бала сайысқа түседі.

“Барлығы 5 команда жиналды. Олардың арасында облыстың жасөспірімдер құрамасы, «Жеңіс» спорт мектебінің командасы, Алматы, Қызылорда және Өскеменнің командалары бар. Жасөспірімдер арасында осындай жеке жарыстар өтеді. Қазір күзгі чемпионат, одан кейін қысқы чемпионат болады. Осыған ұқсас чемпионатты екі жыл бұрын өткізген болатынбыз. Ол кезде бізде 10 команда болды. Қазір өзге қалаларда жарыстар өтуде, соған байланысты ұжымдардың бәрі бірдей келмеді”,- деді “Жеңіс” спорт мектебінің волейбол бойынша жаттықтырушы-оқытушысы Андрей Константин.

ҚР чемпионатының жеңімпаздары мен жүлдегерлері кубоктар, медальдар мен грамоталармен марапатталады.