Петропавлда волонтерлар жалғызілікті қарттардың ауласын қардан тазартты
87 жастағы тыл еңбеккері Любовь Жабина Петропавл қалалық жастар ресурстық орталығының белсенділерінен көмек сұрады. Зейнеткер Ойқала шағын ауданында тұрады, деп хабарлайды QZ News тілшісі.
Тыл еңбеккері жалғыз тұрады. Қыс келе ауланы қардан тазалау зейнеткерге қиындық туғызады. Ол көп жүріп, қозғалуға денсаулығым мүмкіндік бермейді дейді. Еріктілер оның ауласын қардан тазартып берді.
«Жастар ресурстық орталығының белсенділері әлеуметтік даму және ақпарат орталығының жастарымен бірге «Жақсылық жаса» акциясын өткізуде. Жалғыз тұратын зейнеткерлерге үйлерінің ауласын қардан тазалап, отын, көмір, су әкелуге көмектесеміз.Бізге күн сайын қарттардан күнделікті мәселелерді шешуге көмек сұрайтын бірнеше өтініштер келіп түседі. Біз барлығына көмектесуге тырысамыз. Жыл басынан бері 400 жалғызілікті зейнеткерге көмек көрсеттік», – дейді Петропавлдағы жастар ресурстық орталығының жетекшісі Дамир Абдин.