Петропавлдық волонтерлер Мемлекеттік рәміздер күніне орай қоғамдық көлік жолаушыларына жалаушалар таратты

Мемлекеттік рәміздер күніне орай Петропавл қаласының Жастар ресурстық орталығының қызметкерлері мен еріктілері қоғамдық көлікте патриоттық акция ұйымдастырды. Күн бойы олар жолаушыларға жалаушалар таратып, мемлекеттік рәміздердің – Елтаңба, Ту және Әнұранның ұлттық бірегейлік пен тарихи сабақтастықтың негізі екенін еске салды, деп хабарлайды QZ News.

Акция аясында жалпы саны 400-ге жуық жалауша таратылды. Ұйымдастырушылардың айтуынша, мемлекеттік рәміздерді жастар арасында насихаттау – патриоттық сана қалыптастыру мен белсенді азаматтық ұстанымды тәрбиелеудің маңызды бөлігі. Акцияның мақсаты – қалалықтардың назарын ел рәміздеріне құрметпен қарау қажеттілігіне аударып, бірлік сезімін нығайту.

«Бұл шара тек мерекелік көңіл-күй сыйлап қана қоймай, жастарды ұлттық құндылықтар туралы диалогқа тартуға бағытталған. Жастар ресурстық орталығы азаматтық тәрбиелеуге, көшбасшылық қасиеттерді дамытуға және жастарды әлеуметтік маңызы бар істерге тартуға арналған бастамаларды жүйелі түрде іске асырып келеді», – деді Петропавл қалалық Жастар ресурстық орталығының басшысы Дамир Абдин.

Акцияға волонтерлер ерекше белсенділікпен қатысуда. Солардың бірі – Мадияр Асхатұлы. Ол жалаушалар таратып қана қоймай, жолаушыларға мемлекеттік рәміздердің маңызы туралы ақпаратпен де бөлісуде. Оның айтуынша, шағын ғана іс-әрекеттер де елге деген саналы көзқарас қалыптастыру жолында маңызды қадам бола алады.

«Мұндай бастамалар – жай ғана мерекелік әрекет емес, саналы, біріккен және отаншыл қоғам қалыптастыруға қосылған үлес. Үлкен істер кіші нәрседен басталады – қолдағы жалаушадан, жүректегі құрметтен, мемлекеттің рәміздері оның рухын, тарихын және болашағын бейнелейтінін түсінуден», – деп атап өтті ерікті.