Қозыбаев университетінің студенттері өз жобаларын дубайлық инвесторларға таныстырмақ

Қозыбаев университетінің студенттері республикалық ReCodeTau хакатонында «OMNI Green Technology» жобасымен 2 орын иеленді. Енді жалынды жастар жобаларын дубайлық инвесторларға таныстырмақ, деп хабарлайды QZ Media тілшісі ЖОО баспасөз қызметіне сілтеме жасап.

Байқауда қатысушылар omni green бағдарламалық қамтамасыз ету арқылы ферманы автоматтандыру турасында бастама танытқан. Оmni green нақты уақыт режимінде жұмысты бақылауға және кәсіпорынның маңызды көрсеткіштеріне негізгі талдау жасауға, сондай-ақ гидропоникада, балық питомниктерінде, құс фабрикаларында және басқа да ауыл шаруашылығы кешендерінде мөлшерленген жем беруді жүзеге асыруға көмектеседі.

Түркістанда 13-14 сәуір аралығында өткен сайысқа Қазақстанның түкпір-түкпірінен 20-дан астам команда қатысты. Қазір біздің білім алушылар Астанада жыл сайын өтетін Enactus Kazakhstan мектеп және студенттік кәсіпкерліктің Ұлттық кубогында өнер көрсетуге дайындалуда. Бұған дейін студенттер елімізде алғаш рет өтетін әлем чемпионатына қатысу үшін лига кезеңінен өткен болатын. Бұл жастарға тың жобаны әлемдік аренада көрсетуге мүмкіндік береді.

«Бұл – Қазақстанда өз жобамызды көрсету және іске асыру мүмкіндігі. Біз өте қуаныштымыз. Әрине, әрі қарай жоғары белестерді бағындыруға қадам жасаймыз. Алда үлкен және елеулі жұмыс күтіп тұр», – деді Қозыбаев университетінің студенті Алдияр Эрсаин.