СҚО полицейлері есірткіні бөлшектеп-өлшеушіні ұстады

Есірткіні жеткізу арналарының жолын кесу – СҚО ПД есірткі қылмысына қарсы іс-қимыл бөліністерінің жұмысындағы басым бағыттардың бірі, деп хабарлайлы QZ Media тілшісі.

Тамыз айында солтүстікқазақстандық полицейлер астаналық әріптестерімен бірлесіп, Петропавл қаласына кіреберістегі «Оңтүстік» бақылау пунктінде «Toyota Alphard» автокөлігін тоқтатты.

Ішінде отырған 52 жастағы жолаушыдан сарғыш түсті кесектелген зат салынған 3 полимерлік түйіншек және бөлшектеп өлшеуге арналған құрал-жабдықтар, дәлірек айтқанда граммдық таразы мен буып-түю материалы тәркіленді. Сараптама нәтижесі тәркіленген заттың аса ірі мөлшердегі α-PvP синтетикалық есірткісі екенін көрсетті, салмағы 624 граммды құрады.

«Бұл партия екі мыңға жуық адамды нашақорлыққа тартуға жеткілікті. Күдікті есірткі таратумен айналысатын интернет-дүкендердің бірінде бөлшектеп-өлшеуші болып жұмыс істеген. Аталған факті ҚР Қылмыстық кодексінің 297-бабының 3-бөлігі бойынша Сотқа дейінгі тергеп-тексерулердің бірыңғай тізілімінде тіркелді. Баптың санкциясы 15 жылға дейін бас бостандығынан айыру жазасын көздейді»,- деп баяндады СҚО ПД ЕҚҚІҚБ бастығы Иван Терзиди.