«Таза Бейсенбі»: СҚО-да 100 тоннадан астам қоқыс жиналды

Маусымның 6-сы күні ел бойынша «Таза Қазақстан» жалпыұлттық науқаны аясында «Таза бейсенбі» республикалық акциясы басталды. Осылайша «AMANAT» партиясының белсенділері мен қоғам өкілдері жұртшылықты тазалыққа шақырды, деп хабарлайды QZ Media тілшісі.

Солтүстік Қазақстан облысында ластанған аумақты ретке келтіруге 800-ге жуық адам шықты. Ең үлкен учаскелердің бірі облыс орталығында анықталды. Акция аясында партиялықтар, спортшылар, денсаулық сақтау саласының қызметкерлері, жастар, зейнеткерлер мен депутаттар 20-шы ақшам ауданында тау-тау болып үйіліп жатқан жерді күл-қоқыстан тазартты.

«Жуков көшесі, 5в мекенжайының маңында орналасқан учаске алдын-ала таңдалып алынған. Шаруаға «Новинтех» және «Коммунхоз» ЖШС ұсынған 5 бірлік техника жұмылдырылды. Сондай-ақ, 100-ден астам еріктілер мен белсенділер қосылды. Айта кетейін, бұл акция апта сайын өтетін болады», – деді «AMANAT» партиясының СҚОФ атқарушы хатшысы Жеңіс Асанов.

Аталған экологиялық іс-шараға қатысқан жандар шаһарға бей-жай қарауға болмайды дейді. Грек-рим күресінен халықаралық дәрежедегі спорт шебері, Қазақстан ұлттық құрамасының мүшесі Аманғали Бекболатов ең алдымен тазалықты өзімізден бастауымыз керек деп санайды. Ол барша азаматтарды тазалық шараларына белсенді қатысуға шақырды.

«Бүгінде шаһарда қоқыс өте көп. Бәріміз бір адамдай тазалап бірігуіміз керек. Жастарға үлгі болуымыз қажет. Қоршаған ортаға қалай бей-жай қарамау керектігін көрсетуіміз керек», – деді Аманғали Бекболатов.

«Таза бейсенбі» экологиялық акциясы аясында барлық өңірлерде алдын-ала елді мекендердің ластанған аумақтарының карталары әзірленетін болады. Одан кейін әрбір ластанған учаскеге партияның бастауыш партия ұйымдары мен филиалдары бекітіліп, олар ай сайын бекітілген учаскелерде тәртіп пен тазалықты сақтауды қамтамасыз етеді, сондай-ақ абаттандыру мен инфрақұрылымды дамытуға байланысты мәселелерді шешеді.