“Жұмыс басталмаған үйлер бар”: Қала әкімі су басқан тұрғын үйлерді қалпына келтіру кезінде туындайтын проблемалар туралы айтты

Осы көктемде Петропавлда топан судың салдарынан 2400-ден астам үй зардап шекті. Оның ішіндегі 1696 үй апатты деп танылды. Қалған 757 ғимарат жөндеуге жарамды, шамамен 400-інде қалпына келтіру жұмыстары аяқталуға жақын. Бұл туралы облыс орталығының әкімі Серік Мұхамедиев 1 тамыз күні тікелей эфир барысында айтты, деп хабарлайды QZ Мedia тілшісі.

“1030 апатты үй сүрілді, қыркүйекке қарай абаттандыруды бастау үшін апатты үйлер тұрған аумақты толық босату міндеті тұр. Пәтер кілттерін 761 адам алды. “Бірлік” шағын ауданындағы үйлерге 200-ден астам адам қоныстанды. Осы аптада тағы бірқатар үйді тапсырамыз, адамдар қоныс аударуы үшін біз апта сайын үйлерді пайдалануға беруге тырысамыз, өйткені қыс жақындап келеді, адамдар дайындалып, көмір мен отын әзірлеуі керек. Комиссияға келмейтін адамдар бар, біз оларды іздеуге мәжбүрміз”, – деді Петропавл әкімі.

Облыс орталығының басшысы ескі үйдің орнына жаңа тұрғын үй сатып алуға байланысты әзірленетін барлық мәмілелер қиындықсыз өтпейтінін айтты. Топан су кірген үйлерді қалпына келтіру кезінде де қиындықтар туындайды, деп атап өтті қала басшысы.

“Пәтер сатып алынбас бұрын құжаттар әкімдікке, содан кейін қорға, содан кейін ХҚКО-ға жіберіледі. Мәміле жасау үшін барлық келісім құжаттары қажет. Сонымен қатар, ақша бөлініп келеді. Адамдар комиссияға өте қарқынды келген күндер болды, құжаттар үлкен көлемде түсті, ақша толығымен сұратылды, мәмілелер кезінде кідірістер болды. Адамдар өз бетінше жөндеу жұмыстарын жүргізетін жағдайлар бар, маусым өтіп жатыр, ал олар қаржымен қамтамасыз етуге қосылмаған. Бұл сәт қиын болды, бүгінде бұл мәселе шешілді, төлем жүріп жатыр. Бастапқыда адамдар мехбригадалардан көмек сұраған жағдайлар болды, біз жұмысты ішінара төледік, артынша үй иелері өз ойларын өзгертті, жөндеуді өздері жасайтынын айтты. Мұндай жағдайларда бәрін құжаттарға сәйкес қайта рәсімдеу қиындық тудырды. Кейбір бригадалар шынымен нашар жұмыс істеді, біз оларды жұмыстан шығардық, басқа бригаданы шақырдық, сәйкесінше құжаттарға, ақшаны қайтаруға уақыт кетті. Жұмыс басталмаған үйлер бар”, – деп түсіндірді қала басшысы.