СҚО әкімі аграршыларға майлы және көкөніс дақылдарына басымдық беруді ұсынды

Петропавлда көктемгі егіс жұмыстарын ұйымдасқан түрде жүргізуге арналған дәстүрлі семинар-кеңес өтті. Оған ҚР Ауыл шаруашылығы министрі Айдарбек Сапаров, СҚО әкімі Ғауез Нұрмұхамбетов, аудан әкімдері, ғалымдар, сарапшылар және облыстың аграршылары қатысты, деп хабарлайды QZ News.

Биыл бидай алқабы 2,5 млн га жерді құрайды. Сонымен қатар, майлы дақылдардың егістік көлемі 85 мың га-ға ұлғайтылып, жалпы 760 мың га жерге егіледі. Фермерлер 333 мың тонна минералды тыңайтқыш енгізбек, бұл 2024 жылмен салыстырғанда 30%-ға көп. 470 мың тонна тұқым дайындалды, ал егіс алқаптарына 4 мың жоғары өнімді техника мен 1,5 мың заманауи егіс кешені шығады. Бұған қоса, шаруашылықтар 87 млрд теңгеге 3 мың бірлік жаңа техника сатып алады. Мемлекет тарапынан 52 мың тонна жеңілдетілген дизель отыны бөлінді.

«Солтүстік» ӘКК және «ҚазАгроФинанс» арқылы 60 млрд теңге көлемінде ерте қаржыландырудың арқасында аграршылар маусымға мұқият дайындалды: тұқым, тыңайтқыш және жанар-жағармай сатып алып, техниканы жөндеуден өткізді.

Семинар барысында қатысушылар сарапшылардың ұсыныстарымен, заманауи агротехнологиялармен және көктемгі егісті жүргізудің озық әдістерімен танысты. Жоғары өнімділік пен ресурстарды тиімді пайдалану үшін ауыл шаруашылығы тауарын өндірушілерге осы маңызды аспектілерді ескеру ұсынылды.

«Егіс науқанын сапалы тұқымдарды, агротехнологияларды және заманауи техниканы қолдана отырып, белгіленген мерзімде ұйымдасқан түрде жүргізу қажет. Ауыл шаруашылығында егіс алқаптарын әртараптандыруға ерекше назар аударып, майлы және көкөніс дақылдары сияқты жоғары табыс әкелетін дақылдарға басымдық беру керек. Сондай-ақ, жем-шөп дақылдарының көлемін ұлғайтып, су үнемдеу технологияларын енгізу маңызды», – деп жазды өңір басшысы әлеуметтік желілерде.