Вашингтонда жолаушылар ұшағы апатқа ұшырады

АҚШ-тың астанасы Вашингтонда жолаушылар ұшағы Потомак өзеніне құлады. Ол қонуға ұшып келе жатқан кезде әскери тікұшақпен соқтығысты, деп хабарлайды QZ News BBC-ге сілтеме жасап.

Reuters агенттігінің хабарлауынша, American Airlines әуе компаниясының дереккөзіне сілтеме жасап, ұшақтың жолаушылар тізімінде 60 адам болған. Кейін компания экипажда 4 адам болғанын қосып айтты. Олардың және экипаж мүшелерінің жағдайы туралы ақпарат жоқ. Оқиға орнында іздеу-құтқару жұмыстары жүргізілуде, оған қайықтар мен сүңгуірлер қатысуда. Потомак — жүздеген метр енді және бірнеше метр тереңдіктегі мол ағынды өзен.

АҚШ-тың Азаматтық авиация басқармасы (FAA) хабарлағандай, Bombardier CRJ700 ұшағы Уичита қаласынан (Канзас штаты) Вашингтонға әдеттегі рейс жасады. Бейнебақылау камерасынан (қашықтықта, қараңғылықта) ұшақтың өзен жағасында орналасқан Рональд Рейган атындағы әуежайға қонуға жақындап келе жатқан кезде басқа ұшақпен соқтығысқаны және жарылыс болғаны көрінеді.

FAA басқа әуе көлігі тікұшақ екенін мәлімдеді, ол Sikorsky U-60 әскери тікұшақ болған.

Reuters агенттігінің хабарлауынша, тікұшақта үш әскеридің болғаны айтылуда. Олардың жағдайы туралы да ақпарат жоқ.

Пентагон қысқаша мәлімдеме жасап, ұшақпен соқтығысқан тікұшақтың Вирджиния штатындағы Форт-Бельвуар базасынан ұшып шыққанын растап, бортта қанша адам болғаны және олардың жағдайы туралы ақпарат берген жоқ.

Рональд Рейган атындағы әуежай Ақ үй мен Капитолийден шамамен 4 шақырым оңтүстікте орналасқан. АҚШ президенті Дональд Трамп қысқаша мәлімдеме жасап, апат пен құтқару операциясы туралы толық ақпарат алатынын айтты.