Алматыдағы хостелдердің бірінде өрт болып, салдарынан 13 адам қаза тапты

30 қараша күні сағат 05:30-да Алматының Әди Шәріпов көшесіндегі хостел өртенді. Алдын ала дерек бойынша, 13 адам қаза тапты, деп хабарлайды QZ Мedia тілшісі мегаполистің ТЖ департаментіне сілтеме жасап.

Өрт туралы хабарлама таңғы сағат 05:30-да түскен. Жеті минуттан кейін мамандар оқиға орнына жетіп, үш қабатты ғимараттың жертөлесін сөндіруге кіріседі. Ғимараттың жертөлесі мен бірінші қабаты хостел ретінде адамдарды қабылдапты.

Өрт сөндіру орнынан мамандар 13 қаза тапқан адамды анықтады. Олардың жеке басы анықталып жатыр. Алдын ала мәліметтер бойынша, олардың барлығы улы газдан қайтыс болған.

Өрт кезінде жатақханада 72 адам болған, олардың 59-ы өрт орнынан өз бетінше шыққан. Олардың барлығы жақын маңдағы мектеп ғимаратына орналастырылды. Барлық зардап шеккендерге дәрігерлер қажетті көмек көрсетіп жатыр, әкімдік тарапынан тамақ берілді. Әкімдік бір сағат ішінде барлығын ауданның қонақ үйлеріне орналастыруға уәде берді.

Көп ұзамай қала билігі өрт орнындағы жұмыстар және зардап шеккендерді эвакуациялау пунктіне орналастыру жалғасып жатқанын хабарлады. Алматы уақытымен сағат 08:40-тағы жағдай бойынша өрт орнынан ауруханаға үш адам жіберілді.

Куәгердің айтуынша, өрттің шығуына төсек-орынның жануы себеп болуы мүмкін.