Қазақстанда жұмыс кестесін өзгерту ұсынылды

Мәжілісте орталық атқарушы органдардың, ұлттық компаниялар мен оларға қарасты ұйымдардың қызметкерлері үшін жұмыс күнінің басталу уақытын өзгерту ұсынылды. Депутат Асылбек Нұралиннің айтуынша, бұл Астана мен басқа да ірі қалалардағы көлік кептелісін азайтуға мүмкіндік береді, деп хабарлайды QZ News Tengrinews.kz-ке сілтеме жасап.

Мәжіліс депутаты Асылбек Нұралин бұл мәселе бойынша премьер-министр Олжас Бектеновтің атына депутаттық сауал жолдады. Парламент өкілдері Астана мен Қазақстанның басқа да ірі қалаларындағы көлік инфрақұрылымының тұрақты түрде шамадан тыс жүктелуіне алаңдаушылық білдірді. Оның айтуынша, мегаполистер жүйелі түрде көлік кептелісіне, қоғамдық көліктің жүрісінде кідірістерге және жол инфрақұрылымына түсетін аса ауыр салмаққа тап болып отыр. Бұл халықтың күнделікті өміріне де, қалалық инфрақұрылымның дамуына да кері әсерін тигізуде.

«Астана мен Алматының ерекшелігі – агломерациялық өсімнің жоғары қарқыны, маятниктік көші-қон мен бақылаусыз урбанизациямен қатар жүруі. Сарапшылардың болжамынша, алдағы жылдары Астана халқының саны екі миллион адамға жетуі мүмкін. Жұмыс орындарының басым бөлігі мен әлеуметтік инфрақұрылым нысандары қаланың орталығында шоғырланған. Таңғы қарбалас уақытта қала маңынан ағылған халықтың көптігінен көлік коллапсы орын алады», – деді депутат.

Нұралиннің мәліметінше, елордадағы жұмыспен қамтылған халықтың жартысынан астамы мемлекеттік органдарда еңбек етеді. Осыған байланысты ол орталық атқарушы органдар, ұлттық компаниялар және бағынысты ұйымдар қызметкерлері үшін жұмыс күні басталу уақытын өзгерту арқылы көлік ағынын қайта бөлу мүмкіндігін қарастыруды ұсынды.

«Зерттеулер көрсеткендей, таңғы уақыттар еңбек өнімділігі тұрғысынан анағұрлым нәтижелі. Жұмыс кестесін 09:00-ден 07:00 немесе 08:00-ге ауыстыру ұсынылып отырған шараларға сәйкес келеді», – деп атап өтті Нұралин.