Қазақстанның бай азаматтары көбірек салық төлейтін болады

9 сәуір күні Мәжілісте Ұлттық экономика министрі Серік Жұманғарин жаңа Салық кодексінің қабылдануы қандай салдарға әкелетінін айтып берді. Құжатта көптеген жаңа ережелер бар, соның ішінде «люкс салығы» деп аталатын норма да қарастырылған, деп хабарлайды QZ News NewTimes.kz агенттігіне сілтеме жасап.

«Маңызды бастамалардың бірі – жеке табыс салығына прогрессивті мөлшерлеме енгізу. Жылдық табысы 8 500 АЕК-тен асатын қызметкерлер үшін 15% мөлшерінде жоғарылатылған салық ставкасын енгізу ұсынылады. Бұл жоғары табыстарға қосымша салық салуға мүмкіндік беретін тетік жасайды. Мемлекеттік бағалы қағаздардан түсетін табысқа 10% мөлшерінде КТС салығы салынады. Қазіргі уақытта олар салықтан босатылған», — деді Серік Жұманғарин.

Сондай-ақ, кейбір тауарлар санатына жоғары салық салу ұсынылып отыр, яғни «люкс салығы». Осы мақсатта құны 450 миллион теңгеден асатын жылжымайтын мүлікке мүлік салығының мөлшерлемесін арттыру ұсынылады. Сонымен қатар, құны 75 миллион теңгеден асатын жеңіл автокөліктерге, сондай-ақ қымбат теңіз және әуе көліктеріне акциз енгізу жоспарланып отыр. Әділдік мақсатында қымбат алкогольді ішімдіктер мен сигарларға 10% мөлшерінде акциз енгізу ұсынылады.

«Осылайша, ұсынылып отырған салық реформасы табысын жасырып жүрген адал емес салық төлеушілерге қарсы бағытталған, сондай-ақ салық салудағы әділеттілікті арттыру көзделіп отыр. Байлар көбірек төлеуі тиіс», — деп түйіндеді ҰЭМ басшысы.

Сонымен қатар, үкімет жаңа жеке кәсіпкерліктерді (ЖК) ашуға қойылатын талаптарды күшейтуді ұсынды. Жұманғариннің айтуынша, «егер адам бұрын заң бұзған болса немесе бұрын ашылған, бірақ әрекетсіз ЖК-лері бар болса, жаңа ЖК ашу қиынырақ болады — мұндай жағдайлар үшін жаңа шектеулер дайындалған».