ҚР Бас прокуроры Берік Асылов: «Азаматтар қорғауды сөз жүзінде емес, іс жүзінде сезінуі керек»

Қазақстан Республикасының Бас прокуроры Берік Асылов «Заң және Тәртіп» қағидатын іске асыру бойынша кеңес өткізді. Ол өзінің әлеуметтік желідегі парақшаларында атап өткендей, бірнеше өңірде (Ақтөбе, Атырау, Павлодар және т.б.) жасөспірімдер қылмысы өсіп келе жатыр, деп хабарлайды QZ News.

«Профилактиканы күшейтуді, антибуллинг бағдарламаларының тиімділігін зерттеуді тапсырдым. Қоғамдық орындардағы қауіпсіздікке ерекше назар аудардым. Қауіпті аймақтарды бейнекамералармен және жарықтандырумен жабдықтау, патрульдеуді күшейту қажет. Азаматтар қорғауды сөз жүзінде емес, іс жүзінде сезінуі керек», – деп жазды Берік Асылов.

Ол жол-көлік оқиғаларының күрт өсуі алаңдаушылық тудыратынын атап өтті: бір жыл ішінде +67%, жарақат алғандар саны +79%. Бұл, әсіресе, Атырау, Қостанай, Ақтөбе, Жетісу қалаларына қатысты.

«Жол-көлік апаттарынан қаза болғандардың 72%-ы тас жолдарда орын алған. Жүргізушілердің еңбек режимін бақылауды, балаларды тасымалдау ережелерінің сақталуын қамтамасыз етуді тапсырдым. Халықаралық сарапшылардың қатысуымен Талғар мен Рудныйда қауіпсіздікті талдау бойынша пилоттық жобаны іске қосамыз. Өңірлердің криминологиялық паспортын жасау, уәкілетті органдармен бірлесіп мектептерде заң мәдениетін дамыту жұмыстарын үйлестіру тапсырылды», – деп түйіндеді ҚР Бас прокуроры.