2024 жылы СҚО-да 10 аудан инвестиция бойынша тиісті жоспарды орындамаған

Петропавлда облыстық әкімдіктің отырысы өтті, оның күн тәртібінде өңірге инвестиция тарту мәселесі қаралды. СҚО кәсіпкерлік және индустриялық-инновациялық даму басқармасының басшысы Дархан Әмриннің мәліметінше, өткен жылы облысқа 556 млрд теңге инвестиция тартылып, өсім 123,9%-ды құрады. Бұл – рекордтық көрсеткіш, деп хабарлайды QZ News.

Үкімет бекіткен жылдық жоспар 99,7%-ға орындалды (20 өңірдің ішінде 8-орын). Жеке инвестиция көлемі 116,3%-ды немесе 420 млрд теңгені құрады, ал олардың жалпы инвестиция көлеміндегі үлесі 75,5% болды.

Тікелей шетелдік инвестициялардың жылдық жоспары 191%-ға орындалып, 120,5 млн АҚШ долларын (2024 жылдың 3-тоқсанындағы деректер бойынша) құрады.

Алайда, Дархан Әмриннің айтуынша, 10 аудан белгіленген көрсеткіштерді орындай алмаған: Айыртау,  Қызылжар,  Ақжар, Есіл, М.Жұмабаев, Аққайың, Шал ақын, Мамлют, Тимирязев, Уәлиханов.

«Бұған қоса, 8 аудан белгіленген көрсеткіштің 90%-ын да орындай алмады, оның ішінде ең төмен жоспарлы аудандар бар. Мысалы, жоспар орындалмағанымен қатар, Тимирязев ауданында 2023 жылмен салыстырғанда 100% өсімге де қол жеткізілмеген. 2025 жылға негізгі капиталға салынатын инвестициялардың нысаналы индикаторы – 650,2 млрд теңге. Жыл басынан бері облыстық жоспар аудандар мен Петропавл қаласы арасында бөлінді, барлық әкімдіктерге жеткізілді. Алайда, жылдың басынан бастап кейбір аудандар 2024 жылдың сәйкес кезеңімен салыстырғанда төмен көрсеткіш көрсетуде, бұл – жол беруге болмайтын жағдай», – деп атап өтті басқарма басшысы.

2025 жылдың қаңтар-ақпан айларында негізгі капиталға салынған инвестиция көлемі 37 млрд теңгені немесе 2024 жылдың сәйкес кезеңімен салыстырғанда 86,7%-ды құрады. Жылдық жоспардың алғашқы 2 айда орындалуы – небәрі 6%.

Қаңтар-ақпан қорытындысы бойынша 7 аудан оң динамикаға жете алмады. Сонымен қатар, Айыртау (12,0%), Мамлют (21,2%), Жамбыл (21,2%) және Шал ақын (68,7%) аудандары теріс динамика көрсетті.