Азық-түлік өнеркәсібін дамыту: Петропавлда донат өндіретін зауыт салынып жатыр

Солтүстік Қазақстан облысы әкімдігінің отырысында «Бейкертон» компаниясының бас директоры Марина Баяндиева Петропавлда донат өндіретін зауыт құрылысының барысы туралы айтты, деп хабарлайды QZ News.

Зауыттың құрылысы «Қызылжар» арнайы экономикалық аймағының аумағында жүріп жатыр. Қазіргі уақытта темірбетон іргетасын орнату жұмыстары аяқталуға жақын, ал металл конструкцияларды монтаждау басталды. Жобаға 37 млрд теңге инвестиция құйылып, 380 жұмыс орны ашылады.

«Зауытта донат өндіруге арналған екі толық автоматтандырылған желі орнатылады. Кәсіпорын толық қуатына шыққан кезде жылына 15 мың тонна өнім өндіре алады. Мемлекеттік органдар тарапынан жобаға толық қолдау көрсетілуде», – деді Марина Баяндиева.

Облыс әкімі Ғауез Нұрмұхамбетов бұл жобаның перспективалы екенін атап өтіп, мемлекет «Қызылжар» АЭА-ның қосалқы аймақтарына инженерлік инфрақұрылым тарту жөніндегі міндеттемелерін толық орындайтынын айтты.