Петропавлда әскери білім беруге инновациялық технологияларды енгізу мәселесі талқыланды
«Qyzylzhar creative center» креативті индустрия орталығында «Қазақстан Республикасы Ұлттық ұланы әскерлерінің қызметтік-жауынгерлік қызметі – Қазақстан Республикасының тұрақтылығы мен ішкі қауіпсіздігінің негізі» атты халықаралық ғылыми-тәжірибелік конференция өтті. Іс-шараны ҚР Ұлттық ұланы академиясының қызметтік-жауынгерлік қолдану тактикасы кафедрасы ұйымдастырды, деп хабарлайды QZ News.
Конференцияға Академияның әскери қызметшілері, қазақстандық және шетелдік ғалымдар, магистранттар мен оқытушылар қатысты.
Қатысушыларға Академия штабының бастығы – Академия бастығының бірінші орынбасары, полковник Асқар Файзулин және қызметтік-жауынгерлік қолдану тактикасы кафедрасының бастығы, полковник Жамбыл Күлбаев құттықтау сөз сөйледі.
Пленарлық отырыс барысында құқықтық тәртіп әскерлерін дамыту, әскери қызметшілерді даярлау жүйесін жетілдіру, әскери білім беру саласына инновациялық технологияларды енгізу мәселелері талқыланды. Өз баяндамаларын Академияның оқытушылары, магистранттары мен курсанттары, сондай-ақ Өзбекстан Республикасының ғалымдары ұсынды. Негізгі тақырыптар қатарында – әскери қызметшілердің құқықтық тәрбиесі, моральдық-психологиялық дайындық, азаматтық қорғаныс, әскерге заманауи технологияларды енгізу перспективалары болды.
«Конференция ұйымдастыру комитетіне 80 ғылыми мақала келіп түсті. Олардың арасында Өзбекстан Республикасы, Қазақстан Республикасы Төтенше жағдайлар министрлігі, Ұлттық қорғаныс университеті, өңірлік қолбасшылықтар, Ұлттық ұлан әскери бөлімдері мен Академиясының өкілдері бар. Конференция ұлттық қауіпсіздікке қатысты өзекті мәселелерді талқылап, ғылыми тәжірибе алмасудың маңызды алаңына айналды. Оның нәтижелері Ұлттық ұлан әскерлерінің қызметтік-жауынгерлік қызметін жетілдіруге елеулі үлес қосады», – деп хабарлады ҚР Ұлттық ұланы Академиясының баспасөз қызметі.
