Сергеев су қоймасындағы су деңгейі төмендеуде

28 наурыз сағат 08:00-дегі жағдай бойынша Сергеев су қоймасының бөгеті арқылы су тасуының деңгейі 96 см құрады, деп хабарлайды QZ News тілшісі.

Солтүстік Қазақстан облыстық «Қазгидромет» филиалының мәліметінше, гидроқұрылғының толу деңгейі – 117%. Су қоймасының көлемі – 810 млн текше метр. Су деңгейі – 896 см. Су айдынының жағдайы – толық қатпаған.

Сондай-ақ су деңгейінің төмендеуі келесі гидробекеттерде байқалады: Бабықбурлық өзені – Гусаковка ауылы, Шарық өзені – Рузаевка ауылы, Аққанбұрлық өзені – Возвышенка ауылы, Мұққыр өзені – Мұқыр ауылы, Иманбурлық өзені – Соколовка ауылы, Есіл өзені – Тоқсан би ауылы, Есіл өзені – Крещенка ауылы, Есіл өзені – Сергеевка қаласы, Есіл өзені – Покровка ауылы, Шағалалы өзені – Северное ауылы, Қамысақты өзені – Ясновка ауылы, Есіл өзені – Шоптыкөл ауылы, Шат өзені – Ленинградское ауылы.

«27-31 наурыз аралығында өзендердің жоғарғы ағысы, алқаптар мен сайлардан еріген қар суының келуіне байланысты Солтүстік Қазақстан облысында мұз жағдайының одан әрі әлсіреуі және өзендердегі су деңгейінің көтерілуі күтіледі. Соның салдарынан автожолдарды, елді мекендерді, тұрғын үйлер мен шаруашылық ғимараттарын еріген сулар басуы мүмкін», – деп хабарлады СҚОФ «Қазгидромет».