Шал ақын ауданында қант зауыты салынады

Солтүстік Қазақстан облысында қант өндірісі жолға қойылады. “Asyl Farms” ЖШС-нің басшысы Ғабиден Балғынбеков шаруашылықтың жаңа бағыт – қант қызылшасын өсіру және қант өндіру ісін дамытуды жоспарлап отырғанын мәлімдеді. Қант зауыты Шал ақын ауданында салынбақ, деп хабарлайды QZ News.

«Жоба іске асқан жағдайда тәулігіне 5 мың тоннаға дейін қант қызылшасын өңдеуге мүмкіндік болады. Шикізаттың жартысын өзіміздің егістік алқаптарымызда өсіріп, қалған бөлігін көршілес фермерлерден сатып алуды жоспарлап отырмыз», – деді Ғабиден Балғынбеков.

Облыс әкімі Ғауез Нұрмұхамбетов жобаны қолдап, оның жүзеге асырылуы ішкі нарықты қантпен қамтамасыз етіп қана қоймай, импортқа тәуелділікті төмендететінін атап өтті. Мемлекет бұл жобаны жүзеге асыруға барынша қолдау көрсетеді.

Сонымен қатар, “Asyl Farms” ЖШС басқа да перспективалы жобаларды қолға алуда. Атап айтқанда, май экстракциялау зауытының, құрамажем өндірісін іске қосатын кәсіпорынның және автоматтандырылған элеватордың құрылысы жоспарлануда.