Солтүстік Қазақстан облысының жергілікті билігі Smart City мүмкіндіктерін кеңейту, жасанды интеллектіні дамыту және жаңа цифрлық платформаларды интеграциялау жоспарын іске асырмақ
Солтүстік Қазақстан облысы халықтың өмір сүру сапасын және аймақ экономикасын жақсарту үшін цифрлық технологияларды дамытуын жалғастыруда. Алдағы жоспарлар – жасанды интеллектінің одан әрі дамуы, Smart City мүмкіндіктерін кеңейту және жаңа цифрлық платформаларды енгізу. Бұл шаралар Қазақстанның Орталық Азиядағы цифрландыру көшбасшысы ретінде бәсекеге қабілеттілігін арттыру, инвестициялар тарту және Қазақстанның позициясын нығайтуға бағытталған. Бұл туралы Солтүстік Қазақстан облысының цифрлық технологиялар басқармасының басшысы Азамат Байтимиров QZ News агенттігіне мәлімдеді.
Қазақстан цифрландыру саласында ауқымды реформаларды іске асырып, цифрлы болашаққа нық қадам басып келеді. Орталық Азиядағы цифрлық трансформация көшбасшысы ретінде еліміз мемлекеттік басқару, экономика және әлеуметтік салада заманауи технологияларды енгізіп жатыр. Солтүстік Қазақстан облысы да осы үрдісті белсенді түрде қолдап, негізгі салаларда цифрлық технологияларды енгізуге басымдық беруде.
Мысалы, білім саласында біздің өңір цифрландыру деңгейінің жоғары екенін көрсетуде. Барлық мектептер «Bilimland» және «BilimClass» цифрлық платформаларына қосылған, ал 30 мектеп Smart-school моделінде жұмыс істейді. Балабақшаларда «Электронды балабақша» жобасы енгізілген. Колледждерде оқу процесін басқаруды жеңілдететін толық автоматтандырылған жүйелер жұмыс істейді.
«Денсаулық сақтау саласы да цифрлық болашаққа қадам басып келеді. 72,3% медициналық мекемелер интернетпен қамтамасыз етілген, ал 90% медициналық ақпараттық жүйелермен (МИС) жұмыс істейді. Жедел жәрдем қызметі автоматтандырылған, бұл азаматтардың өтініштерін тез арада өңдеуге мүмкіндік береді. Сонымен қатар, 16 телемедицина кешені орнатылды, оның көмегімен 2024 жылы 3 488 кеңес берілді. Аймақ тұрғындары дәрігерге жазылу және медициналық ақпарат алу үшін DamuMed мобильді қосымшасын белсенді түрде пайдаланады», – деп атап өтті Азамат Байтимиров.
Тұрғындардың ыңғайлылығы үшін Петропавл қаласында «109» Бірыңғай байланыс орталығы жұмыс істейді, ол азаматтардың өтініштерін және мемлекеттік қызметтерді бір жүйеге біріктіреді. Орталық «Aikey» және «Цифрлық аналитикалық карта» бағдарламаларын қолданады, бұл өтініштерді нақты уақыт режимінде бақылап, тез арада жауап беруге мүмкіндік береді. Орталық ашылғаннан бері 321 000-нан астам өтініш түсті, олардың көпшілігі бірінші қоңыраудан-ақ шешілді.
Қауіпсіздік саласында да цифрлық технологиялар белсенді түрде қолданылады. Облыста 43 468 бейнебақылау камерасы жұмыс істейді, оның ішінде Петропавлда 21 708 камера бар. Жолдарда 59 автоматтандырылған жол ережесін бұзу кешені орнатылған, бұл жол-көлік оқиғаларының азаюына ықпал етті.
«Көлік саласында Электронды тасымал төлем жүйесі (ЭСОП) сәтті жұмыс істейді, 2024 жылы осы жүйе 26 миллион рет пайдаланылды. Сонымен қатар, қоғамдық көліктердің қозғалысын онлайн бақылауға мүмкіндік беретін диспетчерлік жүйе іске қосылды. Тұрғын-үй коммуналдық шаруашылығы да цифрлық трансформациядан өтуде. 33 цифрлық қызметті ұсынатын Sqoqyzmet.kz біріңғай порталы, сондай-ақ коммуналдық қызметтерді төлеуге арналған sk-energo.kz порталы жұмыс істейді. Қалада 8,7 мың энергия үнемдеуші көше шамдары орнатылды, бұл электр энергиясын 40%-ға дейін үнемдеуге мүмкіндік береді», – деді спикер.
СКО ақпараттық технологиялар саласының дамуына белсенді түрде қолдау көрсетуде. 2024 жылы «Women Startups» бизнес-инкубациясы мен «Business Camp for Teenagers» жазғы IT-лагері ұйымдастырылды. «Decentrathon 2.0» және «Digital Nomads» сияқты ірі хакатондар өткізілді, олар блокчейн, жасанды интеллект және қалалық басқару саласындағы инновациялық шешімдерді іздеуге бағытталған. Маңызды оқиға ретінде «SKO HUB» аймақтық IT-Hub ашылды, ол «Менің мамандығым – IT» халықаралық байқауының операторы болып табылады. Сондай-ақ Astana Hub-пен ынтымақтастық туралы келісімшартқа қол қойылды, бұл стартаптар мен жас IT-мамандар үшін жаңа мүмкіндіктер ашады.