СҚО әкімі су тасқыны жағдайын бағалады: аудандарды аэровизуалды бақылау не көрсетті?

Солтүстік Қазақстан облысының әкімі Ғауез Нұрмұхамбетов су тасқыны қаупі бар аудандардың аэровизуалды мониторингін жүргізіп, жағдайды әуеден бағалады. Ұшу барысында Есіл өзені бойымен Шал ақын, Ғабит Мүсірепов, Айыртау және Тимирязев аудандары, сондай-ақ Шағалалы өзені мен Чаглинка су қоймасы бойындағы Тайынша, Ақжар және Уәлиханов аудандары қамтылды, деп хабарлайды QZ News.

Қазіргі су тасқыны жағдайы туралы СҚО Төтенше жағдайлар департаментінің бастығы Жомарт Асқаров, Тайынша ауданының әкімі Берік Әлжанов және Ғ. Мүсірепов ауданының әкімі Руслан Аңбаев баяндады.

«Ауа температурасының тұрақты түрде жоғары болуына байланысты егістік алқаптарындағы қардың басым бөлігі еріді, алайда кейбір аудандарда еріген қар суының қаупі әлі де сақталуда. Өзендерде мұз кептелісі байқалмайды, алдын алу мақсатында жару жұмыстары жүргізілді. Сонымен қатар, кейбір автожолдарда уақытша су тасу жағдайлары тіркелді», – деп жазды облыс әкімі әлеуметтік желілерде.

Есіл өзені бойымен келген су ерекше қауіп төндіріп отыр. Сергеев су торабында су тасу деңгейі 22 наурыз күні сағат 20:00-де 81 см-ге жетті және оның біртіндеп көтерілуі байқалады. 2024 жылғы рекорд – 425 см. Қазіргі уақытта су деңгейіне тұрақты мониторинг жүргізілуде.

Мемлекеттік органдар мен барлық қызметтер тәулік бойы жұмыс істеп, су тасқынының салдарын азайту және елді мекендерді қорғау бойынша қажетті шараларды қабылдауда.