Жыл басынан бері 1,7 миллионнан астам қазақстандық ХҚКО-ларда электронды талон пайдаланды

Биылғы жылдың басынан бері 1,7 миллионнан астам адам «ЦОН» мобильді қосымшасы арқылы электронды талон алып, мемлекеттік қызметтерді алу үдерісі едәуір жылдамдады, деп хабарлайды QZ News.

Кезекке QR-код арқылы тіркелу функциясы көптеген азаматтар үшін таптырмас құралға айналды. Қаңтар айынан бері электрондық форматта 1 764 007 талон берілген. «Азаматтарға арналған үкімет» мемлекеттік корпорациясының мәліметінше, бұл қабылдау аймағына түсетін жүктемені азайтып, азаматтардың кезекте күту уақытын едәуір қысқартуға мүмкіндік берді.

«Виртуалды талон – қағаз талонның толық баламасы. Ол азаматты жалпы кезекке тіркеп, тіркеу бөліміне жүгінудің қажеттілігін жояды. Қызметті пайдалану үшін смартфонға «ЦОН» мобильді қосымшасын жүктеп (Google Play және App Store-да қолжетімді), авторизациядан өтіп, «ХҚКО-ға кезекке талон» қызметін таңдап, ресепшнде орналасқан QR-кодты сканерлеу, қажетті қызметті таңдап, «Жалғастыру» батырмасын басу жеткілікті. Жүйе автоматты түрде виртуалды талон жасап, келуші өзінің нөмірі ақпараттық таблода шыққаннан кейін маманға өте алады», – делінген Мемлекеттік корпорация хабарламасында.