СҚО-да ерекше балалармен жұмыс істейтін мамандардың тапшылығы байқалады

Отбасы және халықты әлеуметтік қорғау мәселелері жөніндегі өңірлік кеңестің отырысында «AMANAT» партиясының Жол картасын іске асыру талқыланды. Ерекше назар мектептердегі инклюзияны қолдау кабинеттеріне аударылды, деп хабарлайды QZ News.

Білім басқармасы бөлімінің басшысы Валентина Черныхтың айтуынша, облыста осындай 27 кабинет жұмыс істейді, оның 9-ы облыс орталығында орналасқан. Бұл кабинеттерде 650-ге жуық бала білім алады, алайда мамандардың тапшылығы өзекті мәселе болып отыр: өңірде дефектологтар, логопедтер және педагог-ассистенттерді қоса алғанда, 26 бос жұмыс орны бар.

Кеңес төрайымы Сауле Сұрағанова ақпан айындағы мониторинг қорытындысы бойынша елеулі кемшіліктер анықталғанын атап өтті.

«Кабинеттердің материалдық-техникалық базасы талаптарға сай емес. Арнайы жабдықтар, оқу материалдары мен білікті мамандар жетіспейді. Сонымен қатар, мамандардың жалақысы әлі де төмен деңгейде қалып отыр», – деді ол.

Кеңес кабинеттердің жабдықталуын жаңартуды, ерекше қажеттіліктері бар балаларға арналған оқу жағдайын жақсартуды, мамандарға арналған курстар ұйымдастыруды және олардың жалақысын көтеру мүмкіндігін қарастыруды ұсынды.