СҚО-да жеркепеде тұрған ұры 7 жылға бас бостандығынан айырылды

Өткен жылдың желтоқсан айында полиция департаменті ормандағы жеркепеде жасырынып жүрген Мағжан Жұмабаев ауданының 48 жастағы тұрғынын ұстағанын хабарлады. Полицейлер оны ұрланған жылқының ізімен тауып, малдың етін бөлшектеп жатқан жерінен қолға түсірген, деп хабарлайды QZ News.

Аудандық полиция бөлімінің бастығы Асан Мейрамовтың айтуынша, бұл азамат бұған дейін екі пәтер ұрлығы үшін сотталған. Бір жағдайда бос тұрған үйден спутниктік антенна мен қабылдағыш құрылғыны, кілемдер мен төсеніштерді алып шыққан. Антеннаны екі бөтелке араққа айырбастап, қалғанын сатып жіберудің сәті түспей, қоқысқа тастаған. Басқа бір үйден азық-түлік, телефон және планшет ұрлаған.

Телефонға сатып алушы таппаған соң өзінде қалдырған, ал планшетті жоғалтып алған. Кейіннен сот оны бас бостандығын шектеу жазасына кескен, бірақ ол пробация қызметіне есепке тұрудан бас тартып, қайта қылмысқа барған. Бұрын өзі ұрлық жасаған үйге қайта кіріп, азық-түлік жинап, Булаево – Молодогвардейское тасжолы маңындағы қалың орманға жасырынып, пеші бар жеркепе жасаған.

Орманнан ол тағы бір ұрлыққа шығып, бұрын жұмыс істеген жеке шаруашылықтағы үйге кіріп, қолға үйретілген жылқыны, ер-тоқым мен жүгенді, сондай-ақ киіз етікті ұрлап кеткен.

Полковник Мейрамовтың айтуынша, бұл уақытта аудандық полиция қызметкерлері қылмыскердің жеке басына еш күмәнданбаған. Тергеу материалдары сотқа жолданып, сот ер адамды кінәлі деп танып, 7 жылға бас бостандығынан айыру жазасын тағайындады. Үкім заңды күшіне енді.