Төтенше жағдайлар министрі СҚО құтқарушыларына жаңа техниканың кілтін табыстады

Петропавл қаласының орталық алаңында Солтүстік Қазақстан облысының құтқару бөлімшелеріне жаңа құтқару техникаларын табыстау рәсімі өтті. Заманауи техникалардың кілттерін ҚР Төтенше жағдайлар министрі, генерал-майор Шыңғыс Әрінов жеке өзі табыстады, деп хабарлайды QZ News.

Жаңа техникалар аймақтың төтенше жағдайларға – өрт, су тасқыны және басқа да апаттарға жедел әрекет ету мүмкіндігін едәуір арттырады. Табыс етілген техниканың қатарында – жедел әрекет ету көліктері мен ең күрделі әрі қолжетімсіз жерлерде жүре алатын жол талғамайтын көлік бар.

Төтенше жағдайлар министрі Шыңғыс Әрінов заманауи құрал-жабдықтардың маңызын айта келе, құтқарушылардың кәсіби даярлығы бәрінен маңызды екенін ерекше атап өтті:

«Жақсы техника – мүмкіндігімізді кеңейтеді. Бірақ шешуші рөлді оны дұрыс қолдана білетін адам атқарады. Бізге тек дайын болу ғана емес, сонымен қатар құтқаруға көмектесетін барлық нәрсені қадірлеу маңызды», – деді министр.

Жаңа техникалар – солтүстікқазақстандық құтқарушылардың техникалық әлеуетін арттырып, кез келген жағдайға дайын болуына үлкен үлес қосатыны сөзсіз.