Ұлыстың ұлы күні Петропавлда кең көлемде аталып өтті
Солтүстік Қазақстан облысында Наурыз мейрамы ерекше сән-салтанатпен тойланды. 10 күнге созылған Наурызнама мерекесінің шешуші кезеңі облыс орталығының бас алаңында кең ауқымда тойланды, деп хабарлайды QZ News.
Облыс әкімі Ғауез Нұрмұхамбетов орталық алаңда жиналған солтүстікқазақстандықтарды Жаңа жылмен құттықтап, баршаға бақыт, береке және өркендеу тіледі. Ұлттық мерекенің көркі дәстүрлі киіз үйлермен әрленіп, қала тұрғындары мен қонақтарына қазақ халқының мәдениеті мен салт-дәстүрлерімен танысуға мүмкіндік жасалды.
«Наурыз мейрамы мыңдаған солтүстікқазақстандықты біріктірген, татулық пен бірліктің символына айналған маңызды оқиға болды. Баршаңызды мерекемен құттықтаймын!» – деп жазды өңір басшысы әлеуметтік желілерде.
Аймақ басшысы мерекелік алаңдағы әртүрлі тақырыптық киіз үйлерді аралады. Онда қолөнер шеберлерінің жұмыстары қойылып, Сәбит Мұқанов, Шоқан Уәлиханов және Смағұл Сәдуақасов сынды тарихи тұлғалардың мерейтойларына арналған көрмелер ұйымдастырылды. Этноауыл «Көшпенділер әлемі» нағыз мәдениет пен дәстүрдің тірі энциклопедиясына айналды. Көпшілікке әртүрлі ұлттық салт-дәстүрлер көрсетілді, соның ішінде «Атқа отырғызу» – баланы атты тізгіндеуге үйрету рәсімі ерекше қызығушылық тудырды.
«Тәуелсіздік Стелласы» жанындағы киіз үй өңірдегі колледждердің жетістіктері мен жаңа технологияларын таныстырды. Мұнда «Жұмысшы мамандықтар жылы» аясында білікті мамандарды даярлау жөнінде мағлұмат берілді.
Облыс әкімі спорттық алаңға да барып, қатысушылармен бірге асық ату, тоғызқұмалақ, қой көтеру, қазақ күресі, жілікк ұру, қол күресі және гір көтеру сайыстарын тамашалады. Мерекелік шараның ең әсерлі сәттерінің бірі – төрт дүркін әлем рекордшысы, Гиннес рекордтар кітабына енген Сергей Цырульниковтің өнер көрсетуі болды. Ол көпшіліктің көз алдында ат әбзелдерін майыстырып, өзінің ерекше күшін паш етті.
Сонымен қатар, Конституция көшесінде Солтүстік Қазақстан облыстық Қазақстан халқы ассамблеясы мен «Қызылжар» креативті индустрия орталығы өз шығармашылық жобаларын ұсынды.
Осылайша, Наурыз мейрамы Петропавлда кең көлемде, көтеріңкі көңіл-күймен және ұлттық құндылықтарға бай мазмұнда атап өтілді.