«ЗИКСТО» зауыты роботтандырылған техникамен әртүрлі жылжымалы құрамға арналған бөлшектер шығаратын болады

СҚО әкімдігінің отырысында «ЗИКСТО» зауытының директоры Данис Арасланов кәсіпорынның даму жоспары туралы айтты. «ЗИКСТО» зауыты платформалы вагондар, хоппер вагондар және жолаушылар вагондарын өндірумен айналысады, деп хабарлайды QZ News.

Қазіргі уақытта зауытта 450 адам жұмыс істейді. 2024 жылдың қорытындысы бойынша кәсіпорын 100 млрд теңгенің өнімін шығарып, 28%-ға өсім көрсетті. 2025 жылы тапсырыстар портфелін кеңейту жоспарлануда.

«Жолаушылар вагондарын және платформалы вагондарды өндіретін жаңа цехтың құрылысы бойынша инвестициялық жоба жүзеге асырылуда. Инвестиция көлемі – 24 млрд теңге, жұмыс орындарының саны 900-ге дейін артады. Жылына 3 мың вагон құрастырамыз. Қазіргі уақытта құрылыс-монтаждау жұмыстары жүргізіліп жатыр, іске қосу биылғы жылдың 4-тоқсанына жоспарланған», – деді Данис Арасланов.

Жаңа өндірістік корпуста заманауи роботтандырылған техника қолданылады. Бұл әртүрлі жылжымалы құрам үлгілеріне арналған бөлшектер мен тораптарды шығаруға мүмкіндік береді.

Сонымен қатар, кәсіпорын жартылай вагондар, мұнай өнімдерін тасымалдауға арналған цистерналық вагондар және автокөлік тасымалдаушы вагондар өндірісін игеруді жоспарлап отыр.

СҚО әкімі Ғауез Нұрмұхамбетов өңірде вагон құрастыру саласын дамытуға үлкен жоспарлар бар екенін атап өтті. «Бұл жоба – еліміздегі теміржол жылжымалы құрамын жаңартудағы маңызды қадам», – деді өңір басшысы.