«AUYL SPORT-2024» республикалық турнирінде Қызылжар ауданының волейболшылары бірінші орынды иеленді

Волейболдан «AUYL SPORT-2024» республикалық турнирінің финалы өтті. Спорттық іс-шараға еліміздің түкпір түкпірінен 1300ден астам жас спортшы қатысты. Ауқымды спорттық доданы «Халық» қайырымдылық қоры ұйымдастырды, деп хабарлайды QZ News тілшісі.

«AUYL SPORT-2024» жобасы осыдан үш ай бұрын облыстық турнирлерден бастау алды. Оған 200 ауылдан 12 мыңнан астам балалар мен жасөспірімдер қатысты. Жарыстың ақтық сынында бокс, күрес, каратэ, баскетбол, волейбол және шахмат секілді алты спорт түрі бойынша жарыстар өтті.

Турнирге Солтүстік Қазақстан облысы Қызылжар ауданының волейболдан қыздар командасы қатысты. Финалда спортшылар Жамбыл облысының құрамасымен кездесті. Солтүстік Қазақстан облысының волейболшылары құрметті бірінші орынды жеңіп алды.