Президенттік көпсайыс: Петропавлда спортшылар ҚР Кубогы үшін күресті жалғастыруда

Облыс орталығында екінші күні Президенттік көпсайыстан ҚР Кубогы өтуде. Естеріңізге сала кетейік, беделді жарысқа еліміздің 8 облысынан 96 спортшы қатысып жатыр, деп хабарлайды QZ News тілшісі.

3 қараша күні таңертең жарыс қатысушылары спринтте, ал күннің екінші жартысында жүзуде өз күштерін сынады. Соңғы аталған бойынша спортшылар 50 және 100 метр қашықтықты бағындыруы қажет.

“Жарыс жыл сайын өткізіледі. Жыл сайын біздің спортшылардың нәтижелері жақсарып келеді. Сонымен қатар, бізде қысқы және жазғы көпсайыстан облыстық жарыстар өткізіледі. ҚР Кубогында СҚО намысын 18 спортшы қорғауда. Жарыс жеңімпаздарына ҚР Туризм және спорт министрлігінің грамоталары мен кубоктары табыс етіледі”, – деді жарыстың бас төрешісі Руслан Қожаев.

Бірінші жарыс күнінде спортшылар оқ ату бойынша өз мүмкіндіктерін сынады. Қостанай облысы көш бастады, ал СҚО командасы екінші орынға табан тіреді. Президенттік көпсайыстан ҚР Кубогына балалар, жасөспірімдер мен қыздар, сондай-ақ ардагерлер қатысады.