СҚО-да футбол академиясын салу жоспарланып отыр

Солтүстік Қазақстанда спорт саласы қарқынды дамып, облыс орталығы мен аудандарда жаңа нысандар бой көтеріп жатыр. Астанада өткен баспасөз мәслихатында Ғауез Нұрмұхамбетов спорт нысандарының құрылысына қатысты жүзеге асырылып жатқан жобалар туралы айтып, ауқымды жоспарларымен бөлісті, деп хабарлайды QZ News тілшісі.

«Тірек ауылдарда спорт және сауықтыру орталықтары бар. Үш жылдың ішінде біз 158 спорт алаңын салдық. Қалада үлкен үстел теннисі орталығын салдық. «Береке» шағынауданында спорттық сауықтыру орталығын аштық. Мұз айдынын салу жоспарымызда бар, нысан салынып жатыр, келесі жылы пайдалануға беріледі. Қазір УЕФА стандартына сай келетін «Қарасай» стадионында қайта жөндеудің екінші кезеңі жүріп жатыр. Бұл нысанды келесі жылы пайдалануға береміз. МЖӘ арқылы футбол академиясын салуды жоспарлап отырмыз», – деді Ғауез Нұрмұхамбетов.