Жуан жұдырықты өңір полицейлері Қазақстан кубогына дайындалып жатыр

13-14 қазан аралығында Қарағанды қаласында өтетін ММА Free fighting Қазақстан кубогына Солтүстік Қазақстан облысының намысын қорғауға 10 жас спортшы мен 3 полиция қызметкері барады, деп хабардайды QZ Media тілшісі.

СҚО құрамасын дайындаумен аға жаттықтырушы Нұрқанат Шаримов пен полиция қызметкері Марлен Баранбаев айналысуда. Баранбаев жедел қызметкерлерге, тергеушілер мен криминалистерге қоян-қолтық ұрыстан дәріс береді. Бос уақытында “Динамо” ДСҰ қамқорлығымен SUNQAR аралас жекпе-жек федерациясының балалар бөлімінде жаттықтырумен айналысады.

Жақында оның шәкірттері Қостанай қаласынан GAMMA MMA бойынша бірінші халықаралық турнирінен оралды. Оған қазақстандық командалардан басқа Ресей, Қырғызстан, Өзбекстан, Тәжікстан спортшылары қатысты. “Сұңқаршылар” бұл сайыстан 8 алтын және 8 күміс медаль жеңіп алды. 3 алтынды полиция қызметкерлері қаңжығаларына байласа, қалғанын жас спортшыла еншіледі.

Жарыстың қорытындысы бойынша солтүстік қазақстандықтар ММА бөлімінде бірінші жалпы командалық орынды алса, striking бөлімінде екінші орынды иеленді. СҚО командасының тағы бір спортшысы, Марленнің тәрбиеленушісі Нұртас Сабыр “сегіздік” гран-при жарысына қатысты. Бұл жерде Қазақстан өңірлерінен үздік 8 жауынгер бақ сынасты. Нұртас 10-11 жас аралығы санатында чемпионат белбеуін жеңіп алды.

“Балалармен сабақтар тек хобби ғана емес, сонымен қатар патриоттық тәрбиенің элементі. Полицияның еліміздің жас азаматтарының қалыптасуына үлес қосуға мүмкіндігі бар екені жақсы. Өскелең ұрпаққа қамқорлық жасау — Қазақстан Республикасының, ортақ Отанымыздың болашағына қосқан құнды үлесі, – деді полиция қызметкері.